Íslenskur stuttmyndaframleiðandi gerir það gott

Íslenskur stuttmyndaleikstjóri og framleiðandi, Eva Sigurðardóttir er nú í Cannes að kynna stuttmynd sína „Red Reflections“ á einskonar sölumarkaði fyrir stuttmyndir. Myndin var valin sem ein af 35 myndum til að taka þátt af yfir 2000 öðrum myndum.

Mynd Evu var valin sem ein af eftirtektarverðustu myndunum í bækling sem gefinn var út fyrir hátíðina en um og yfir 2000 stuttmyndir eru í pottinum. Eva er nú í óða önn við að kynna mynd sína fyrir sölu og dreifingaraðilum og hafa fundarhöldin verið stíf síðustu daga.

Á hátíðinni er einnig í gangi örlítil keppni milli leikstjóra þar sem þau segja frá hugmynd sinni að nýrri stuttmynd. Sú hugmynd sem fær flest atkvæði í atkvæðagreiðslu á netinu fær fimm þúsund evrur að launum. Handritshöfundar, leikstjórar og framleiðendur keppa semsagt sín á milli um að fá kostun á mynd sína.

Myndin heitir „Ein af þeim“. „Þetta er stuttmynd sem að ég skrifaði og ætla að leikstýra. Þetta er mynd um unglinga á Íslandi. Þetta handrit er mikið byggt á minni eigin reynslu sem unglingur í kópavoginum. Ég var lögð mikið í einelti heima, og þess vegna flutti ég erlendis þegar ég var 14 ára. Þessi mynd er því semsagt um síðasta árið mitt á íslandi. En það er samt líka mikill skáldskapur í handritinu.“

„Ég framleiði oftast, þannig að það að ég sé að fara að leikstýra er nýtt. Ég sótti um að taka þátt í þessari keppni, og var valin. Núna er keppnin á netinu, og verður opin til kl. 16.00 á íslenskum tíma á morgun. Svo fara fimm topp myndirnar til dómnefndar, og sigurvegari verður valinn á fimmtudaginn í Cannes.“

Eva segir að þessi heimur heilli hana, og að geta nýtt listformið til þess að vekja fólk til umhugsunar um samfélagið sitt sé henni dýrmætt. „Ég hef verið að vinna með  Selmu Björk Hermannsdóttur , 16 ára gamalli stelpu sem lögð var í einelti og hefur rætt þetta opinberlega á síðasta ári. Hún hefur verið að lesa yfir handritið, og hefur verið frábært að fá góða punkta frá henni um það hvernig það er að vera unglingur í dag.“

Hægt er að greiða Evu Sigurðardóttur atkvæði sitt með því að fara hér inn, líka við síðuna, velja myndband Evu Sigurðardóttur og fara neðst á síðuna og staðfesta atkvæði þitt