Utanríkisráðherra fundar með framkvæmdastjóra ÖSE

„ÖSE er í einstakri aðstöðu til þess að vinna að friðsamlegri lausn á átökunum sem nú eiga sér stað í Úkraínu. Ég tel afar mikilvægt að við, sem aðildarríki, leggjum okkar af mörkum til þess að stofnunin geti sinnt þessu hlutverki sínu," segir Gunnar Bragi Sveinsson utanríkisráðherra sem staddur er í Austurríki á ráðherrafundi Evrópuráðs.

Gunnar Bragi fundaði í dag með Lamberto Zannier, framkvæmdastjóra Öryggis- og samvinnustofnunar Evrópu (ÖSE). Þeir ræddu starf stofnunarinnar í aðildarríkjunum og verkefni hennar í Úkraínu. Zannier þakkaði Íslandi sérstaklega fyrir þátttökuna í verkefnum ÖSE í Úkraínu og fyrir sýnilegt hlutverk í eftirlitssveit stofnunarinnar þar. Gott orð fari af vinnu Íslands.

Stefán Haukur Jóhannesson, sendiherra, fer fyrir einu af tíu eftirlitsteymum stofnunarinnar í landinu, en nú er unnið að því að fjölga eftirlitsmönnum hennar úr eitt hundrað í fimm hundruð. Þá átti Ísland fulltrúa í alþjóðlegu eftirliti í mars sl. byggt á svokölluðu Vínarskjali sem veitir þátttökuríkjum heimild til að bjóða ríkjum sem lýst hafa yfir áhyggjum af hernaðarumsvifum að kynna sér frá fyrstu hendi aðstæður á staðnum.

Að tillögu utanríkisráðherra ákvað ríkisstjórnin fyrir helgi að auka stuðning við eftirlitsverkefni ÖSE í Úkraínu. Íslensk stjórnvöld munu leggja sex milljón króna fjárframlag til verkefnisins auk þess sem ráðuneytið sendir annan starfsmann til starfa.