Mikilvægt að grípa til bráðabirgðaaðgerða í Hrísey

Bæjarráð Akureyrar fundaði í dag þar sem meðal annars var rætt um atvinnuástand í Hrísey. Þrettán starfsmönnum Hvamms í Hrísey verður sagt upp um mánaðarmótin en Hvammur er stærsti vinnuveitandi eyjunnar.

Ráðið hefur þungar áhyggjur af því ótrygga atvinnuástandi sem íbúar Hríseyjar búa við. „Þetta fyrirtæki er burðarásin í Hrísey. Þetta er eins og Samherji myndi segja upp öllum sínum landverkamönnum á Akureyri,“ sagði starfsmaður hjá útgerðarfélaginu Hvammi í Hrísey við Vísi í gær.

„Ástæða uppsagnanna er rekstrarörðuleikar, það vantar fisk og það er búin að vera leiðindatíð og lítil veiði. Það er erfiður rekstur á þessu,“ sagði Þröstur Jóhannsson, einn eigenda Hvamms.

Ályktun bæjarráðs Akureryrar í heild sinni:

Bæjarráð Akureyrar lýsir yfir þungum áhyggjum af því ótrygga atvinnuástandi sem íbúar Hríseyjar búa við. Mikilvægt er að grípa til bráðaaðgerða til að bregðast við því áfalli að Útgerðarfélagið Hvammur hafi sagt upp öllu sínu starfsfólki. Þá er afar brýnt að halda áfram markvissri vinnu til að tryggja blómlegt mannlíf í eynni til lengri tíma litið.