Metþátttaka í skrúðgöngu Fjölmenningardags

Talið er að milli 1500 og 2000 manns hafi tekið þátt í skrúðgöngu í tilefni Fjölmenningardags Reykjavíkur í dag. Um metþátttöku er að ræða, samkvæmt því er segir í tilkynningu frá Reykjavíkurborg.

Elsa Yeoman, forseti borgarstjórnar, setti daginn formlega á Skólavörðuholtinu klukkan eitt í dag. Skrúðgangan fór af stað að lokinni setningu og var gengið niður að Ráðhúsi Reykjavíkur. Þegar þangað var komið opnaði fjölþjóðlegur markaður þar sem gestum og gangandi var boðinn matur frá ýmsum löndum og allskonar varningur var til sölu. 

Í tilefni dagsins var einnig boðið upp á skemmtiatriði fyrir börnin og má þar nefna Sirkus Íslands, tónlistarmanninn Ingó og jójó-listamanninn Pál Valdimar. Dagskrá lauk klukkan 17.00.

Þetta er í sjötta sinn sem Reykjavíkurborg stendur fyrir Fjölmenningardeginum. Er ætlunin með honum að fólk geri sér glaðan dag og fagni fjölmenningu og fjölbreytileika.