Vilja nýja skíðalyftu á topp Skálafells

Til að mæta aukinni afþreyingu fyrir ferðamenn og dreifa þeim á fleiri svæði er nú horft á þann möguleika að koma upp lyftu á topp Skálafells í norðurhlíðum fjallsins til viðbótar við núverandi lyftur. Forsetahjónin voru á meðal gesta á toppi Skálafells í dag og notaði Dorrit Moussaieff tækifæri til að fara á skíði.

Skálafell á Mosfellsheiðinni er eitt vinsælasta skíðasvæði landsins en fjallið er 774 metrar á hæð. Skíðadeild KR hefur umsjón með svæðinu og vill gera svæðið að enn meiri útivistarparardís en það er í dag og kynna sem góðan kost allt árið fyrir ferðamenn. Skíðadeild KR rekur svæðið og vill sjá breytingar þar.

„Ef ég mætti ráða þá myndi ég vilja setja lyftu í norðurhlíðar fjallsins því þá er hægt að nýta þetta líka sem svakalegt útivistarsvæði,“ segir Anna Laufey Sigurðardóttir, formaður skíðadeildar KR. En hverju mun það breyta ? 

„Öllu,  því þá getum við alltaf farð á skíði, er það ekki það sem viljum,“ segir Anna Laufey ennfremur og segir að ný lyfta  myndi líka hafa áhrif á sumarferðamennskuna.  „Já, að sjálfsögðu, ef við fáum stól hingað upp, það er svo ofboðslega fallegt útsýnið hérna en svo fáir sem koma hérna, það þarf að nýta þetta betur“.

Þórir Jónsson, sem er að verða 88 ára er mikill skíðamaður og þekkir Skálafellið manna best. Hann vill sjá nýja skíðalyftu. „Já, til að nota norðurhliðina þar sem að snjórinn er eignlega alltaf alveg frá því að fyrsta snjókornið fellur á haustin og þangað til að sumri eða vori,“segir hann.

Og þú ert að verða 88 ára og ert ennþá á skíðum. „Já, já, ég gef ekkert eftir með það, þeir eru nú sumir eldri“. Og er þetta ekkert mál  ?

„Nei, nei, ekki ef maður  heldur sig við, halda sig við efnið eins og þeir segja“.

Forsetahjónin þáðu boð um að koma upp á topp Skálafells í dag og notaði notaði Dorrit Moussaieff m.a. tækifærið til að renna sér á skíðum.