Sverre um áhuga Lemgo: Ólíklegt en ekki útilokað

Þýska úrvalsdeildarfélagið Lemgo hefur gengið hart að Sverre Andreas Jakobssyni síðustu daga en félagið vill fá hann til liðs við sig eins fljótt og kostur er.

Lemgo er sem stendur í sautjánda sæti deildarinnar með aðeins sex stig úr fimmtán leikjum. Því hafa forráðamenn liðsins leitað allra leiða til að styrkja varnarleik liðsins.

„Þeir hafa haft samband og sett mikla pressu á mig síðustu daga,“ sagði Sverre í samtali við Vísi í dag. „Það er afar ólíklegt að af þessu verði en ég er þegar búinn að ýta þessu frá mér í tvígang. En þeir gefast ekki upp,“ bætti hann við.

Sverre er þó samningsbundinn Akureyri og er þar að auki í fastri vinnu. „Flækjustigið er því nokkuð hátt þó svo að það sé auðvitað ekkert útilokað. Þetta verður endanlega ákveðið í kvöld eða á morgun.“

Sverre, sem er 37 ára, lék með Grosswallstadt og Gummersbach í Þýskalandi og fór frá fyrrnefnda félaginu í sumar. „Það er gaman að maður kemst ennþá í umræðuna úti og sýnir að það er enn smá líf í manni,“ sagði hann í léttum dúr.