Mettuð fita ekki hættuleg hjartanu

Mettuð fita veldur ekki hjartasjúkdómum. Þetta er niðurstaða nýrrar stórrar rannsóknar sem birt var í tímaritinu Annals of Internal Medicine í mars síðastliðnum.

Fjallað er um rannsóknina í The Wall Street Journal. Þar kemur fram að í gegnum tíðina hafi fólki verið ráðlagt að forðast mettaða fitu, sem meðal annars má finna í smjöri, ostum og rauðu kjöti, þar sem hún hefur verið talin stífla slagæðarnar. Þess í stað hefur fólki verið ráðlagt að borða kjúkling í stað lamba- eða nautakjöts og velja olíu í stað smjörs.

Niðurstaða rannsóknarinnar gengur gegn öllum hugmyndum um nútíma næringarfræði. Staðreyndin er hins vegar sú, að því er segir í The Wall Street Journal, að það hafa aldrei fundist beinar sannanir fyrir því að mettuð fita valdi þessum sjúkdómum. „Við teljum að þetta sé vegna þess að stefna í næringarfræðum hafi verið byggð á persónulegum metnaði, lélegum rannsóknum, stjórnmálum og hlutdrægni,“ segir í greininni.