Súkkulaðihúðaðar kaffibaunir frá Kaffitári innkallaðar

Súkkulaðihúðar Expressó kaffibaunir framleiddar af Kaffitári voru innkallaðar í síðustu viku vegna þess að merkingar voru ekki í lagi. Varan er hjúpuð súkkulaði sem inniheldur lesitín sem unnið er úr sojabaunum. Sojabaunirnar eru þekktur ofnæmisvaldur. Heilbrigðisstofnun Suðurnesja tilkynnti Matvælastofnun um málið.

„Við höfum selt þessa vöru í sautján eða átján ár og það hefur aldrei neinn orðið veikur af henni,“ segir Aðalheiður Héðinsdóttir, forstjóri Kaffitárs. Fyrirtækið fékk tilkynningu frá heilbrigðiseftirliti Suðurnesja þann 8. maí þar sem tilkynnt var að merkingar væru í ólagi.

Á umbúðunum kom ekki fram að varan innihéldi lesitín úr sojabaunum. Samkvæmt matvælalöggjöfinni eiga ofnæmis- og óþolsvaldar að vera skýrt merktir í merkingum matvæla. Aðalheiður bendir á að um tiltölulega nýjar breytingar sé að ræða varðandi merkingar á vörunni.

„Það á að standa soja lesitín en hjá okkur stóð aðeins lesitín,“ segir Aðalheiður. Hún minnir á að umræddar kaffibaunir séu aðeins brot af þeim sem fyrirtækið hafi til sölu. Í kjölfarið hafi ranglega merkta varan verið innkölluð, merkt upp á nýtt og sé þegar komin í sölu.

„Auðvitað vill maður hafa hlutina í lagi. Ef það á að standa soja lesitín þá gerum við það.“

Þeir neytendur sem eiga umrædda vöru og eru haldnir ofnæmi fyrir soja afurðum eru beðnir um að farga henni eða skila til Kaffitárs.