Malala gefur verðlaunafé til uppbyggingar á Gaza

Malala Yousafzai, handhafi friðarverðlauna Nóbels í ár og yngsti handhafi verðlaunanna frá upphafi, mun gefa 50.000 Bandaríkjadali sem hún hlaut í verðlaunafé til Sameinuðu þjóðanna sem nota á til uppbyggingar á skólum á Gaza. Margar skólabyggingar þar skemmdust mikið í stríði Ísraels og Palestínu fyrr á árinu. Telegraph greinir frá.

Malala var í Stokkhólmi að taka við öðrum verðlaunum, Alþjóðaverðlaunum barna, þegar hún tilkynnti um að hún ætlaði að gefa peningana.

„Saklaus palestínsk börn hafa þjáðst hrikalega og í alltof langan tíma,“ sagði Malala í Stokkhólmi. „Við verðum að tryggja að allir palestínskir drengir og allar palestínskar stúlkur, og í raun öll börn alls staðar, hljóti góða menntun í öruggu umhverfi. Því án menntunar, verður aldrei friður.“

Þrátt fyrir ungan aldur hefur Malala Yousafzay barist fyrir rétti stúlkna til að mennta sig í Pakistan. Með því hefur hún sýnt fram á að ungt fólk getur tekið þátt í baráttu fyrir auknum réttinum. Með hetjulegri baráttu sinni er hún orðin einn helsti talsmaður ungra kvenna sem vilja mennta sig.