Óskar eftir opnum fundi með þeim sem bera ábyrgð á búsáhaldaskýrslunni

Birgitta Jónsdóttir, formaður Pírata óskar eftir því að haldinn verður opinn fundur hjá stjórnskipunar og eftirlitsnefnd með þeim aðilum sem bera ábyrgð á skýrslu lögreglu um búsáhaldabyltinguna. Þetta kemur fram í tilkynningu frá Alþingismanninum.

Einnig vill hún að þeir aðilar innan lögreglunnar sem bera ábyrgð á að söfnun upplýsinga um mótmælendur er varða t.d. þeirra stjórnmálaskoðanir og fjölskyldutengsl verði boðaðir á fundinn.

„Slíkt á ekki að viðgangast í lýðræðisríki. Ég óska eftir að fundurinn verði haldinn sem allra fyrst.“

Það kennir ýmissa grasa í skýrslu Geirs Jóns Þórissonar um mótmælin á árunum 2008-2011. Þar má meðal annars lesa vitnisburði lögreglumanna frá hverjum einasta degi mótmælanna, meðal annars frá gamlársdegi 2008 þegar mikill mannfjöldi kom saman við Hótel Borg. Þar voru formenn stjórnmálaflokkanna í Kryddsíld Stöðvar 2.