„Guðni kom aðvífandi eins og engill“

„Má ég stækka þessa mynd upp, prenta hana á ál og hengja hana upp fyrir ofan sófann minn?“ skrifar Jóhann Bjarni Kolbeinsson, fréttamaður á RÚV, við mynd sem Edda Sif Pálsdóttir sjónvarpskona náði fyrir utan Melabúðina í gær. Óhætt er að segja að myndin sé í skemmtilegri kantinum.

Eyjamaðurinn Árni Johnson var nýkominn úr Melabúðinni þar sem hann hafði fest kaup á lambakótilettum, mjólk, mysu og glæsilegum gulum gúmmíhönskum. Ekki vildi þó betur til en svo að höldur á pokanum rifnaði svo vörurnar féllu úr pokanum.

„Guðni kom aðvífandi eins og engill,“ segir Árni Johnsen um augnablikið þegar pokinn rifnaði. Hver annar en Guðni Ágústsson, fyrrum landbúnaðarráðherra, var þá mættur til þess að rétta félaga sínum úr Suðurlandskjördæmi hjálparhönd.

„Við erum fóstbræður við Guðni og höfum verið lengi. Við erum miklir félagar,“ segir Árni sem gegndi áratugum saman þingmennsku fyrir Sjálfstæðisflokkinn. Ekki var það svo að þeir félagar væru að versla saman heldur var um hreina tilviljun að ræða að Guðna bar að garði.

Árni, sem eins og alþjóð veit býr í Eyjum, segist reglulega koma við í Melabúðinni þegar hann á leið vestur í bæ.

„Verslunin er persónuleg og mjög góð,“ segir Árni og bætir við aðspurður að kótiletturnar hafi bragðast vel.

Hefði þegið myndina í Hraðfréttir

Myndin hefur vakið mikla athygli eftir að Edda Sif birti hana, með góðfúslegu leyfi þingmannanna fyrrverandi, á Facebook-síðu sinni í gær. Auk Jóhanns Bjarna lýstu fjölmargir yfir aðdáun á myndinni.

„Mysan og Adidas skórnir eru hér í hlutverki besta product placement-s sögunnar,“ skrifar Helgi Seljan í Kastljósinu.

„Mynd segir meira en þúsund orð, hefur tekið næsta level!“ skrifar skemmtikrafturinn Daníel Geir Moritz.

„Ég hefði þegið þetta lokaskot,“ skrifar Benedikt Valsson í Hraðfréttum.

Af Guðna er það hins vegar helst að frétta að hann er lagður upp í ferð með hrútavinafélaginu Örvari norður í Þistilfjörð yfir helgina. Erindið er af dýrari gerðinni en koma á uppstoppaða sauðnum Gorba á forystufjársetrið á Svalbarða eins og lesa má nánar um hér.