Hewson: Sá stærsti síðan United mætti Liverpool

FH-ingurinn Sam Hewson hefur áður tekið þátt í mikilvægum úrslitaleikjum en Englendingurinn öflugi er spenntur fyrir viðureigninni gegn Stjörnunni um helgina.

Hewson kom hingað til lands árið 2011 er hann gekk til liðs við Fram. Hann var þrjú tímabil í Safamýrinni áður en hann söðlaði um í vetur og samdi við FH-inga.

„Þetta eru leikirnir sem ég vildi taka þátt í. Þess vegna kom ég í FH og ég get ekki beðið,“ sagði Hewson við Vísi á æfingu FH-inga í Kaplakrika í gær.

Þessi 25 ára miðjumaður ólst upp hjá Manchester United. Hann var uppgötvaður af njósnurum liðsins þegar hann var að spila með AFC Bolton í samnefndum heimabæ aðeins átta ára gamall.

Hewson var hjá Manchester United næstu tólf árin. Einn af hápunktum þess tíma var þegar hann fór fyrir U-18 liði félagsins sem fyrirliði þess í bikarúrslitum yngri liða (e. FA Youth Cup) gegn erkifjendunum í Liverpool.

United vann fyrri viðureignina, 2-1, og Hewson skoraði sigurmarkið úr vítaspyrnu. Liverpool vann reyndar síðari leikinn og þar með titilinn. Engum dylst þó mikilvægi bikarúrslitaleikja í Englandi og Hewson segir að þessir leikir séu meðal þeirra mikilvægustu sem hann hefur tekið þátt í.

Leikurinn á laugardaginn fer í sama flokk að mati Hewson. „Ég hef ekki unnið deildina áður á Íslandi og ég vil verða meistari með FH. Þetta verður stór leikur fyrir mig eins og aðra stráka í liðinu.“

Hann segir ljóst að enginn leikmaður FH muni sofa á verðinum um helgina. „Allir gera sér grein fyrir því hversu mikilvægur leikurinn er. Enginn leyfir sér að slappa af og við ætlum okkur að ná í þrjú stig.“

Steven Lennon kom til Fram aðeins tveimur vikum á undan Hewson um mitt sumar 2011. Þeir urðu strax góðir vinir og því gladdist Hewson mjög þegar Lennon kom til FH frá Sandnes Ulf í Noregi.

„Ég heyrði af því að hann gat valið á milli FH og KR. Ég vildi auðvitað fá hann hingað og var hæstánægður þegar hann kom. Hann er góður vinur og við höfum þekkst lengi. Steven er frábær leikmaður sem hjálpar liðinu mikið.“

Hewson ætlar ekki að breyta út af venjunni á leikdegi og mun undirbúa sig eins og hann gerir öllu jöfnu. „Ég vakna, fæ mér morgunmat og svo kannski göngutúr. Svo fer ég bara á völlinn.“

Og hann segir að mestu máli muni skipta að FH-ingar einbeiti sér að sjálfum sér. „Við verðum að huga vel að okkar leik og leikáætlun. Ef við höldum okkur við hana og finnum fyrir stuðningi áhorfenda þá veit ég að við munum standa okkur vel.“

„Það verður frábært að fá að taka þátt í leik sem þessum og við viljum standa uppi sem sigurvegarar.“