Endre Ove ökklabrotnaði á KR-vellinum í gær

Endre Ove Brenne verður ekkert meira með Keflvíkingum á tímabilinu en hann ökklabrotnaði í leik á móti KR í gærkvöldi. Keflvíkingar verða því án Brenne í bikarúrslitaleiknum á laugardaginn.

Endre Ove Brenne þurfti að yfirgefa völlinn strax á 17. mínútu. „Hann misstígur sig og er ökklabrotinn," staðfesti Kristján Guðmundsson, þjálfari Keflvíkinga við Vísi. Brenne fór í burtu af KR-vellinum í sjúkrabíl.

Endre Ove Brenne hefur verið óheppinn með meiðsli á tímabilinu en hann hefur aðallega verið að glíma við meiðsli í læri. Leikurinn í gær var fyrsti leikur hans í Pepsi-deildinni síðan 14. júlí eða í tæpan mánuð.

„Hann hefur verið í langan tíma að ná sér af meiðslum á læri og við höfðum verið að spara hann og passa upp á hann. Hann misstígur sig síðan þarna og það má segja að þetta elti hvort annað,“ segir Kristján.

„Þetta setur ákveðið strik í reikninginn í okkar áætlanir en við þurfum að vinna úr því og höfðum ágætis tíma í það," sagði Kristján að lokum.