Innlent

Yfirlýsing frá Hönnu Birnu: Svara umboðsmanni fyrir helgi

Kjartan Atli Kjartansson skrifar
Hanna Birna neitar því að hafa beitt Stefáni Eiríkssyni þrýstingi.
Hanna Birna neitar því að hafa beitt Stefáni Eiríkssyni þrýstingi.
Hanna Birna Kristjánsdóttir, innanríkisráðherra, segir í skriflegri yfirlýsingu sem hún sendi fréttastofu Vísis að hún ætli að verða við kröfum Umboðsmanns Alþingis fyrir helgi.

Umboðsmaður Alþingis sendi Hönnu Birnu bréf fyrr í dag þar sem hann óskaði eftir upplýsingum um samskipti hennar við lögreglustjórann á höfuðborgarsvæðinu. Málið tengist frétt DV í gær, en þar var því haldið fram að Stefán Eiríksson, fráfarandi lögreglustjóri, hefði hætt vegna afskipta Hönnu Birnu þegar „lekamálið“ svokallaða var rannsakað.

Hanna Birna neitar að hafa beitt Stefán þrýstingi í yfirlýsingunni sem hún sendi Vísi:

„Likt og kom fram í fjölmiðlum í gær á ég enga aðkomu að ákvörðun lögreglustjóra um að skipta um starfsvettvang og hef hvorki beitt hann þrýstingi eða haft óeðlileg afskipti af einstökum málum sem eru eða hafa verið til meðferðar hjá lögreglu," segir hún og bætir við:

„Í því máli sem hér er til umræður hef ég og allir starfsmenn ráðuneytisins sýnt fullan samstarfsvilja við rannsókn málsins á öllum stigum enda hefur málið verið rannsakað ítarlega. Líkt og komið hefur fram liggur niðurstaða ekki enn fyrir og mun ég þangað til ekki tjá mig frekar um málið.“

Stefán Eiríksson sagðist í gær, í samtali við Vísi, ekki vilja tjá sig um hvort hann hafi verið beittur þrýstingi. Þá sagði hann:

„Ég er ekki að hætta vegna þrýstings. Ég er ítrekað búinn að segja það í dag. Það er ekki ástæðan fyrir því að ég hætti. Það var bara tímabært að hætta. Og ekki hægt að endurtaka það nógu oft."



Stefán vildi ekki tjá sig um hvort að hann hafi orðið fyrir þrýstingi í „lekamálinu“ svokallaða:

„Ég þarf ekkert að ræða það frekar um það en ég hef gert,“ sagði hann í gær þegar spurningin var ítrekuð svaraði hann:

„Ég hef enga heimild til að ræða rannsókn einstakra mála.“

Bjarni BenediktssonVísir/Stefán
Bjarni vill ekki tjá sig

Bjarni Benediktsson, fjármálaráðherra og formaður Sjálfstæðisflokkinn, sagði við fréttastofu Ríkisútvarpsins að hann ætlaði ekki að tjá sig um málið að svo stöddu. 



Hanna Birna sendi fréttastofu RÚV einnig skriflegt svar við fyrirspurn og þar sagði hún:

„Ég hafna með öllu stóryrtum og ósönnum fullyrðingum DV vegna þessa máls.  Likt og komið hefur fram í dag bæði hjá mér og lögreglustjóra á ég enga aðkomu að ákvörðun hans um að skipta um starfsvettvang og hef hvorki beitt hann þrýstingi eða haft óeðlileg afskipti af einstökum málum sem eru eða hafa verið til meðferðar hjá lögreglu. I því máli sem hér er til umræður hef ég og allir starfsmenn ráðuneytisins sýnt fullan samstarfsvilja við rannsókn málsins á öllum stigum enda hefur málið verið rannsakað ítarlega.  Líkt og komið hefur fram liggur niðurstaða ekki enn fyrir og mun ég þangað til ekki tjá mig frekar um málið.“

Tryggvi fer fram á svör frá Hönnu Birnu.
Umboðsmaður óskar eftir svörum

Fyrr í dag sagði Vísir frá því að Tryggvi Gunnarsson, Umboðsmaður Alþingis, hefði óskað eftir upplýsingum frá Hönnu Birnu um samskipti hennar við lögreglustjórann á höfuðborgarsvæðinu í kjölfar frétta DV um afskipti hennar af rannsókn Lekamálsins svokallaða.

Á heimasíðu umboðsmanns kemur fram að beiðni hans, um upplýsingar frá Hönnu Birnu, byggi á samtölum hans við lögreglustjórann og Sigríði Friðleifsdóttur ríkissaksóknara. Bréfið sem hann sendi innanríkisráðherra var svo:

„Samkvæmt lögum nr. 85/1997, um umboðsmann Alþingis, er það hlutverk umboðsmanns að hafa í umboði Alþingis eftirlit með stjórnsýslu ríkis og sveitarfélaga. Skal umboðsmaður í því sambandi gæta þess að stjórnsýslan fari fram í samræmi við lög, vandaða stjórnsýsluhætti og siðareglur settar á grundvelli laga um Stjórnarráð Íslands og laga um réttindi og skyldur starfsmanna ríkisins. Í framhaldi af frásögn sem birtist í DV sem kom út 29. júlí sl. um tiltekin samskipti yðar, fr. innanríkisráðherra, við lögreglustjórann á höfuðborgarsvæðinu og samtölum sem ég hef átt við lögreglustjórann og ríkissaksóknara, hef ég ákveðið að óska eftir, sbr. 7. gr. laga nr. 85/1997 að þér látið mér í té upplýsingar og tiltæk gögn um eftirfarandi:



1. Hvort þér hafið að eigin frumkvæði óskað eftir að lögreglustjórinn á höfuðborgarsvæðinu kæmi til fundar/viðtals við yður í ráðuneytinu þar sem þér rædduð við hann um lögreglurannsókn sem embætti hans vann að á sama tíma og beinist að meðferð tiltekinna trúnaðarupplýsinga sem voru til staðar í innanríkisráðuneytinu. Óskað er eftir að fram komi hvert var tilefni þessara funda/viðtala, hvenær þau fóru fram og að þér lýsið hvað kom þar fram af yðar hálfu í samtölum við lögreglustjórann um rannsóknina og starfshætti lögreglunnar á höfuðborgarsvæðinu af því tilefni. Þá er óskað eftir að tiltæk gögn um þessi samskipti verði send mér.




2. Með sama hætti er óskað eftir upplýsingum um símtöl sem þér kunnið að hafa átt við lögreglustjórann á höfuðborgarsvæðinu þar sem þér rædduð um áðurnefnda lögreglurannsókn. Óskað er eftir að fram komi hvenær samtölin fóru fram, hvert var tilefni þeirra og hvað kom þar fram af yðar hálfu um rannsóknina. Óskað er eftir að tiltæk gögn um þessi símtöl verði send mér.




Ég tek það fram að beiðni mín um þessar upplýsingar er sett fram til þess að ég geti tekið afstöðu til þess hvort ég tek mál þetta til formlegrar athugunar, sbr. 5. gr. laga nr. 85/1997, og þá með hliðsjón af þeim reglum og sjónarmiðum sem talin eru eiga við um samskipti ráðherra sem fer með yfirstjórn lögreglu við stjórnendur lögregluembætta með tilliti til sjálfstæðis þeirra embætta og ákæruvalds við rannsókn sakamála. Það á sérstaklega við þegar umrædd rannsókn tengist málefnum ráðuneytis viðkomandi ráðherra.“



Tengdar fréttir

Krefjast þess að Hanna Birna segi af sér

Ungir jafnaðarmenn samþykktu í dag ályktun af miðstjórn um að Hanna Birna Kristjánsdóttir, innanríkisráðherra, eigi að segja af sér ráðherraembætti.

Hvatt til óháðrar rannsóknar á lekamálinu

Innanríkisráðherra segir ítarlega rannsókn innan innanríkisráðuneytisins og stofnana þess sýna að minnisblað um hælisleitanda hafi ekki komið úr ráðuneytinu. Mörður Árnason er með minnisblaðið.

Hver er starfsmaður B?

Þingmenn stjórnarandstöðunnar gengu hart að innanríkisráðherra og kröfðust svara.

Stefán Eiríksson tvíræður á Twitter

Eitt af uppáhalds Bítlalögum fyrrverandi lögreglustjóra fjallar um mann sem hættir í lögreglunni og samskipti hans við konu með silfurskeið í munni.

Lekamálið ljótur pólitiskur leikur að mati Hönnu Birnu

Hart var sótt að innanríkisráðherra á þinginu nú rétt í þessu vegna lekamálsins svokallaða. Hanna Birna Kristjánsdóttir ætlar að tjá sig um það síðar en gaf í skyn að það snérist um aðför að sér.

Þórey sögð með réttarstöðu grunaðs manns

Þórey Vilhjálmsdóttir, aðstoðarmaður Hönnu Birnu Kristjánsdóttur innanríkisráðherra, er sögð vera sú sem lak umdeildum minnisblaði um hælisleitandann Tony Omos.

Þórey í mál við DV

Alvarleg ósannindi í umfjöllun DV varðandi hennar þátt í leka minnisblaðsins um hælisleitandann Tony Omos.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.