Innlent

Hver er starfsmaður B?

Sunna Karen Sigurþórsdóttir skrifar
vísir/samsett/daníel
Valgerður Bjarnadóttir, þingmaður Samfylkingarinnar, krafðist svara innanríkisráðherra á þingfundi sem hófst á Alþingi klukkan þrjú í dag vegna lekamálsins svokallaða. Hún sagði Hönnu Birnu Kristjánsdóttur, innanríkisráðherra, skulda þinginu svör vegna málsins og tók Árni Páll Árnason, formaður Samfylkingarinnar undir með Valgerði. 

„Er ráðherrann, eða pólitískir aðstoðarmenn ráðherrans, starfsmaður B?“ sagði Árni Páll og sagði Hönnu Birnu bera pólitíska ábyrgð gagnvart Alþingi að svara þessari fyrirspurn skýrt og greinilega.

Í dómi Hæstaréttar sem féll á mánudag hefur lögregla rökstuddan grun um að starfsmaður innanríkisráðuneytisins, sem kallaður er starfsmaður B, hafi lekið minnisblaði um hælisleitandann Tony Omos í fjölmiðla.

Árni Páll Árnason.vísir/gva
„Ég held að ráðherra verði að svara hvort hann geti staðfest að hvorki hún, né pólitískir starfsmenn hennar séu einn af þessum B sem getið er um í úrskurði Hæstaréttar. Það er að segja að það hafi ekki verið embættismenn sem hafa látið þetta frá sér fara,“ sagði Valgerður Bjarnadóttir.

Lítið var um svör þegar innanríkisráðherra, Hanna Birna Kristjánsdóttir, steig í pontu og sagðist hún ekki vita hvernig málið væri tilkomið. Því gæti hún ekki upplýst þingið um málið. Þá hvatti hún Valgerði til að kynna sér málið betur.

„Nú hlær þingmaðurinn. Það getur verið að henni finnist þetta fyndið en rannsókn málsins er ekki lokið,“ sagði Hanna Birna og sagði að starfsmenn ráðuneytisins í stöðugum samskiptum við fjölmiðla.

Valgerður Bjarnadóttir.vísir/gva
„Ég ítreka það sem ég hef áður sagt. Ég veit ekki hvernig þetta mál er til komið og ég veit ekki hversu oft ég á að segja það,“ sagði Hanna Birna.

Minnisblaðið sem um ræðir var tekið saman af lögfræðingi í ráðuneytinu 19. nóvember 2013, en fréttir um málið birtust að morgni dags 20. nóvember.

Minnisblaðið var tekið saman að beiðni skrifstofustjóra vegna mótmæla sem halda átti fyrir utan ráðuneytið í kjölfar umfjöllunar um afgreiðslu þess á máli hælisleitandans Tony Omos. En vísa átti honum úr landi. Minnisblaðið var vistað á opnu drifi innanríkisráðuneytisins en þeir sem höfðu vitneskju um það og hvað á því stóð voru skrifstofustjóri, lögfræðingurinn sem tók það saman, ráðuneytisstjóri, ráðherra, tveir aðstoðarmenn auk tveggja lögfræðinga sem lásu það yfir. Rannsókn lögreglu benti til þess að ólíklegt væri að það hefði verið sent frá ráðuneytinu með tölvupósti.

Í tilkynningu frá innanríkisráðuneytinu segir að persónuleg samtöl einstakra starfsmanna ráðuneytisins séu sett í sérkennilegt samhengi. Þar segir að stór hluti af daglegu starfi starfsmanna ráðuneytisins séu samskipti við fjölmiðla. Þá segir jafnframt að hvorki ráðherra né aðrir starfsmenn geti ekki tjáð sig um efnisatriði málsins fyrr en rannsókn málsins er lokið.


Tengdar fréttir

Krefjast þess að Hanna Birna segi af sér

Ungir jafnaðarmenn samþykktu í dag ályktun af miðstjórn um að Hanna Birna Kristjánsdóttir, innanríkisráðherra, eigi að segja af sér ráðherraembætti.

Einkamál útlendinga birt án skýrra heimilda

Innanríkisráðuneytið hefur hafið birtingu á úrskurðum sínum um málefni útlendinga. Ekki er skýr lagaheimild fyrir birtingunni og viðkvæmar persónuupplýsingar birtast þrátt fyrir að nafnleyndar sé gætt. Persónuvernd vill að vandað sé til verka.

Máli Tony Omos enn frestað

Eftir stutta fyrirtöku var máli hans frestað til 7.apríl næstkomandi. Taldi lögmaður hans að nauðsynlegt væri að bíða eftir niðurstöðum úr rannsókn lögreglu til frekari gagnaöflunar.

Tony Omos stefnir íslenska ríkinu

Fyrirtöku í máli hælisleitandans Tony Omos um ógildingu á ákvörðun Útlendingastofnunar og úrskurði innanríkisráðuneytisins um synjun á hæli hér á landi var frestað í morgun.

Lekamálið ljótur pólitiskur leikur að mati Hönnu Birnu

Hart var sótt að innanríkisráðherra á þinginu nú rétt í þessu vegna lekamálsins svokallaða. Hanna Birna Kristjánsdóttir ætlar að tjá sig um það síðar en gaf í skyn að það snérist um aðför að sér.

Mótmæli vegna lekamálsins

Boðað hefur verið til mótmæla fyrir framan innanríkisráðuneytið í hádeginu á morgun.

Mun ekki tjá sig efnislega um lekamálið fyrr en niðurstaða liggur fyrir

Hanna Birna Kristjánsdóttir, innanríkisráðherra, hefur ítrekað beðist undan því að mæta í viðtal í Kastljósið til að ræða trúnaðarbrest sem kom upp í innanríkisráðuneytinu. Hún hafði áður samþykkt að veita Kastljósi viðtal í vikunni en hefur hætt við það í bili.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.