Veigar Páll meiddur í baki

Rúnar Páll Sigmundsson, þjálfari Stjörnunnar, staðfesti í viðtali við Valtý Björn Valtýsson á Stöð 2 Sport eftir leik Fylkis og Stjörnunnar að Veigar Páll Gunnarsson, sóknarmaður liðsins hefði ekki verið í liðinu í dag vegna meiðsla.

Veigar sem er 34 árs gamall hefur glímt við meiðsli í baki undanfarnar vikur en þraukaði í 88. mínútur í leik Stjörnunnar og Motherwell á fimmtudaginn. Rúnar sagði að hann hefði einfaldlega ekki getað leikið í dag en vonaðist til þess að hann yrði klár í seinni leikinn gegn Motherwell.

Fjarvera Veigars kom ekki að sök en Stjarnan vann góðan 3-1 sigur og tyllti sér á topp Pepsi-deildarinnar um tíma.