Veigar Páll líklegast hvíldur um helgina

Rúnar Páll Sigmundsson, þjálfari Stjörnunnar, gerir ekki ráð fyrir því að Veigar Páll Gunnarsson geti tekið þátt í leik liðsins gegn ÍBV um helgina.

Veigar Páll neyddist til þess að fara af velli vegna meiðsla í læri um miðbik fyrri hálfleiksins gegn Motherwell í gær en hann hefur einnig glímt við meiðsli í bakinu undanfarnar vikur.

Rúnar staðfesti við Vísi fyrr í dag að þótt hann útilokaði ekkert gerði hann ekki ráð fyrir að Veigar yrði klár fyrir leikinn á sunnudaginn.

„Mér þykir ólíklegt að hann verði með. Ég ætla ekki að segja að það sé alveg útilokað en ég geri ráð fyrir því að hann geti ekki tekið þátt í þeim leik. Hann tognaði ekki en við þurfum bara að vera skynsamir með hann,“ sagði Rúnar.