Koma kísilvera þrengir kosti Helguvíkurálvers

Nýgerðir samningar og viljayfirlýsingar um allt að fjögur kísilver auka þrýsting á fleiri nýjar virkjanir, sérstaklega ef jafnframt á að mæta óskum Norðuráls vegna álvers í Helguvík. Forstjóri Landsvirkjunar bendir á fimm virkjanakosti, sem fyrri ríkisstjórn færði úr nýtingarflokki yfir í biðflokk.

Landsvirkjun hyggst virkja jarðvarma á Þeistareyjum til að mæta orkuþörf kísilvers á Húsavík, og segist eiga næga orku í kerfinu fyrir kísilver United Silicon sem byrjað er að reisa í Helguvík. Öðru máli gegnir um orku fyrir kísilver sem Thorsil áformar í Helguvík, og þá er því einnig ósvarað hvaðan orka á að koma í sólarkísilver á Grundartanga.

Þótt þessir kaupendur ræði einnig við önnur orkufyrirtæki er helst horft til þess hvaða tækifæri Landsvirkjun hefur. Þar nefna menn Hvammsvirkjun í neðri Þjórsá, sem er eina virkjunin sem fékk grænt ljós í sérstakri flýtimeðferð verkefnisstjórnar rammaáætlunar í vetur, og einnig stækkun Búrfellsvirkjunar. „Og svo aðra kosti sem Alþingi ákveður að heimila,” segir Hörður Arnarson, forstjóri Landsvirkjunar. 

En fleiri vilja knýja á um orkukaup og þar ber hæst Norðurál vegna álversins í Helguvík, sem vegna orkuleysis stendur þar hálfbyggt. Gerðardómur fyrir tveimur árum skuldbindur HS Orku til að útvega hluta orkunnar en innkoma kísilveranna þrengir mjög möguleika Norðuráls til að fá þá orku sem á vantar. Ráðamenn Norðuráls vilja ekki tjá sig um þá nýju stöðu sem upp er komin en flestum sem til þekkja ber saman um að mjög erfitt verði að koma álverinu í Helguvík í gang án aðkomu Landsvirkjunar.

Hörður Arnarson staðfestir að Landsvirkjun hafi verið í viðræðum við Norðurál vegna álversins. En hvaða tök hefur Landsvirkjun á að mæta þeirra óskum á næstu árum? 

„Það aftur ræðst af því hvað við ákveðum að nýta frekar. Það eru fjölmargir kostir í rammaáætlun sem á eftir að fjalla um.” Þar bendir forstjóri Landsvirkjunar á Urriðafossvirkjun, Holtavirkjun og Hvammsvirkjun í neðri Þjórsá og Skrokkölduvirkjun og Hágönguvirkjun á hálendinu. „Þeir kostir sem voru komnir hvað lengst og eru þeir kostir sem voru færðir úr nýtingarflokki, - voru fimm kostir sem voru færðir úr nýtingarflokki yfir í biðflokk. Alþingi er nú að fjalla um þá kosti,” segir Hörður Arnarson. 

Ef frá er talin Hvammsvirkjun verða allir þessi kostir í biðflokki að minnsta kosti næstu tvö árin þar sem verkefnisstjórn rammaáætlunar áformar ekki að gera nýja tillögu fyrr en haustið 2016, - nema stjórnvöld gefi fyrirmæli um nýja flýtimeðferð.