Ekki lengur hægt að selja öllum raforku sem óska

Hörður Arnason, forstjóri Landsvirkjunar, segir að sú staða sé að koma upp í orkumálum að ekki sé hægt að selja öllum þeim orku sem þess óska. Markaðurinn hafi snúist við þannig að eftirspurnin sé orðin meiri en framboðið og það sé mjög ánægjulegt fyrir íslenskan efnahag.

Fram kom í fréttum í síðustu viku að orkusamningar liggja fyrir um tvö kísilver og viljayfirlýsingar hafa verið undirritaðar um tvö önnur. Þá hafa lengi legið fyrir óskir Norðuráls um orkukaup til álvers í Helguvík. Og þetta er ekki þeir einu sem eru að falast eftir orkukaupum, að sögn Harðar Arnarsonar, forstjóra Landsvirkjunar.

„Við finnum fyrir miklum áhuga og erum búnir að gera í nokkurn tíma. Eftirspurnin eftir orku á Íslandi er, myndi ég segja, meiri heldur en framboðið. Þannig held ég að það muni verða um ókomna tíð, sem er að okkar mati mjög ánægjulegt umhverfi fyrir orkufyrirtækin og íslenskan efnahag,” segir Hörður.

Hann segir að nú sé komin upp breytt staða frá því sem áður var, þegar Íslendingar biðu árum saman eftir því að erlend fyrirtæki kæmu til að kaupa orkuna. Nú hafi markaðurinn breyst úr því að vera kaupendamarkaður í seljendamarkað. Það sé ekki víst að allir þeir sem vilji stækka eða byggja á Íslandi fái orku. Þannig sé staðan líka allsstaðar í Evrópu. Hörður segir að Landsvirkjunarmenn hafi oft bent á þetta á fundum undanfarin ár, að eftirspurnin verði meiri en framboðið.

„Alveg sama hvað við ákveðum að nýta. Það er að krystallast núna. Og við teljum að það sé komið til með að vera.”