Straumsvík heldur fast í 40 MW úr Búðarhálsi

Orka sem dugar í heilt kísilver er afgangs frá hinni nýgangsettu Búðarhálsvirkjun. Landsvirkjun getur hins vegar ekki ráðstafað orkunni vegna samnings við Rio Tinto Alcan. Viðræður fyrirtækjanna um breytingar hafa ekki skilað niðurstöðu.

Samningur Landsvirkjunar og Rio Tinto Alcan fyrir fjórum árum var forsenda þess að ráðist var í smíði Búðarhálsvirkjunar en megnið af orkunni átti að fara til framleiðsluaukningar í álverinu. Fyrir ári var skýrt var því að hún hefði aðeins náðst að hluta; stefnt var á 20% framleiðsluaukningu en reyndin varð 8%.

Af 95 megavöttum Búðarhálsvirkjunar ætlaði Straumsvíkurálverið að taka 75 megavött en miðað við fréttir í fyrra er það vart að nýta nema rúmlega 30 megavött. En þýðir þá þetta að heilmikið er afgangs af raforku til ráðstöfunar fyrir aðra? 

Hörður Arnarson, forstjóri Landsvirkjunar, segir í viðtali við Stöð 2 að það sé rétt að Alcan í Straumsvík sé ekki að nýta um 40 megavött af því sem það áætlaði vegna breyttra áforma um stækkun verksmiðjunnar. 

„Sú orka er bundin samningi við fyrirtækið og því ekki hægt að nýta hana í önnur verkefni án samþykkis fyrirtækisins,” segir Hörður.

Til samanburðar má geta þess kísilver United Silicon í Helguvík hyggst kaupa 35 megavött af Landsvirkjun, eða álíka mikið og álverið er ekki að nýta. 

Ráðamenn Rio Tinto Alcan vildu ekki svara Stöð 2 í sjónvarpsviðtali um málið í dag. Talsmaður félagsins, Ólafur Teitur Guðnason, tók þó fram að fyrirtækið uppfyllti samninga sína við Landsvirkjun og væri að vinna að því að finna leiðir til að nýta orkuna. 

Forstjóri Landsvirkjunar segir fyrirtækin í þreifingum um hvort hægt sé að finna leið sem henti báðum. 

-En geta þeir þá blokkerað þessa orku af? 

„Ég get nú ekki tjáð mig um samninginn en það er bindandi samningur milli fyrirtækjanna um að við þurfum að afhenda og þeir þurfa að borga. Þannig að það er með ákveðnum skilmálum um hvaða magn þurfi að taka. Þannig að sá samningur gildir,” svarar Hörður Arnarson. 

Rannveig Rist , forstjóri Rio Tinto Alcan, sagði í viðtali um málið við Stöð 2 fyrir ári, þegar tilkynnt var um minni framleiðsluaukningu, að orkusamningurinn væri í gildi og rætt yrði við Landsvirkjun um málið. „Og ég býst bara við því að við leysum þetta í sameiningu og vinnum út úr því,” sagði Rannveig. 

Nú ári síðar er málið enn í lausu lofti. En telur forstjóri Landsvirkjunar að hægt verði að ráðstafa þessari orku í önnur verkefni? 

„Það er of snemmt að segja til um það.” 

-En það eru þreifingar í gangi? 

„Við erum í viðræðum við fyrirtækið um samninginn í heild sinni, já.”