Best að vera móðir í Finnlandi

Það er best að vera móðir í Finnlandi en verst að vera móðir í Sómalíu. Þetta er niðurstaða könnunar sem gerð var í 178 löndum í ár og kynnt í nýrri skýrslu Barnaheilla – Save the children um stöðu mæðra í heiminum.

Ísland er í fjórða sæti listans í ár og hér er barnadauði hvað minnstur í heiminum. Það er aðeins í Lúxemborg þar sem færri börn deyja fyrir fimm ára aldur en hér á landi. Ísland hefur verið í einu af 10 efstu sætum listans í átta skipti síðan skýrslan kom fyrst út árið 2000.

Á Íslandi eru líkurnar á því að barn nái ekki fimm ára aldri einn á móti 435 en í Sierra Leone eru líkurnar einn á móti fimm.

Í ár er sjónum sérstakklega beint að mæðrum sem búa við neyð. Til dæmis að mæðrum sem búa við afleiðingar vegna fellibylja á borð við Haiyan á Filippseyjumeða til mæðra sem búa í þróunarlöndum eða stríðshrjáðum löndum á borð við Lýðveldið Kongó og Sýrland. Niðurstöður skýrslunnar hjálpa til við að skilja og bregðast við þörfum þeirra.

Af stríðshrjáðum löndum, sem yfirleitt eru afar neðarlega á listanum, stendur góður árangur í baráttunni við mæðra- og barnadauða í Afghanistan upp úr.

„Tengslin á milli þróunarlanda eða landa þar sem átök geisa og hárri tíðni mæðra- og barnadauða gætu litið út fyrir að vera augljós, en á meðan tölur í sumum þessara landa eru mjög háar, sýna önnur að hægt er að bjarga lífum mæðra og barna, þrátt fyrir afleiðingar stríðs eða annarra hörmunga;” segir Erna Reynisdóttir, framkvæmdastjóri Barnaheilla – Save the Children á Íslandi.

„Meira en helmingur allra tilfella mæðra- og barnadauða í heiminum á sér stað í þróunarlöndum eða þar sem átök eiga sér stað. Langflest tilfellin eiga sér stað vegna þess að innviðir samfélaganna hafa hrunið, skortur er á nauðsynlegum tækjum eða að þjálfað heilbrigðisstarfsfólk er ekki til staðar við fæðingu.“