Regluverkið skoðað vegna myglusvepps

Lög og reglur á sviði byggingarmála verða ef að líkum lætur teknar til heildstæðrar endurskoðunar með tilliti til myglusveppa og tjóns af völdum þeirra. Starfshópur skipaður af ráðherra á að skila af sér tillögum fyrir lok árs.

Þingsályktunartillaga 13 þingmanna þessa efnis var til síðari umræðu á Alþingi á föstudag, en flutningsmaður málsins er Kristján L. Möller, þingmaður Samfylkingar. Í nefndaráliti umhverfis- og samgöngunefndar Alþingis er lagt til að tillagan yrði samþykkt óbreytt.

Katrín Júlíusdóttir, þingmaður Samfylkingarinnar, talaði fyrir nefndarálitinu, og sagði að fara yrði yfir lög og reglur, fræðslumál og ekki síst tryggingarmál þeirra sem fyrir því verða að veikjast vegna myglusveppa og missa jafnvel allar sínar eigur. Málið kemur til atkvæðagreiðslu síðar í dag en ekkert er því til fyrirstöðu að það verði samþykkt, enda málið flutt af þingmönnum allra flokka.

Tilefni málsins er ekki síst það að um 50 íbúðarhús á Egilsstöðum og Reyðarfirði fóru illa vegna myglusvepps. Eins að yfir 100 fjölskyldur hér á landi hafa þurft að yfirgefa heimili sín til lengri eða skemmri tíma á undanförnum árum vegna heilsufarsáhrifa og annars tjóns af völdum myglusveppa. Tugir þeirra hafa sagt alfarið skilið við hús­næðið, eins og segir í greinargerð tillögunnar.

Kristján sagði á Alþingi í gær, á sama tíma og hann hvatti Sigurð Inga Jóhannsson umhverfisráðherra til að hafa hraðar hendur við skipun starfshópsins, að „brenni hús til grunna þá er það tryggingarmál og fæst bætt. Komi hins vegar upp myglusveppur og eina úr­ræðið er að rífa húsið, og jafnvel með öllum húsgögnum og fatnaði fólks og öðru, þá er það óbætt. Þetta verður starfshópurinn að gera tillögur um því á þessu þarf að taka,“ sagði Kristján og sagði ótækt að fólk missi aleiguna en þurfi áfram að borga af lánum vegna húsnæðis sem hefur verið rifið.

Bjarkey Gunnarsdóttir, þingmaður Vinstri grænna, tók í sama streng og líkti upplifun fólks vegna þessa vanda sem hamförum, og því alvarlegra væri að engin úrræði væri að finna í kerfinu.