Konur eiga meiri möguleika á starfi innan kirkjunnar

Alvarlegur kynjahalli er í embættum og ábyrgðastöðum innan kirkjunnar. Níutíu sóknarprestsembætti eru á landinu og þar af eru konur í tuttugu og þremur embættum, eða um fjórðungur sóknarpresta. Félag prestsvígðra kvenna sendi frá sér ályktun þess efnis á dögunum.

„Eins og við vitum þá hefur kirkjan verið karlakirkja öldum saman. Það er byggt upp á löngum tíma og tekur tíma að snúa til baka,“ segir Agnes M. Sigurðardóttir, biskup. Hún segir kirkjuna hafa tekið upp stefnu sem taki mið af gildandi jafnréttislögum á Íslandi um jafna stöðu og jafnan rétt kvenna og karla.

Í jafnréttisstefnu kirkjunnar segir að mið sé tekið af því að þjóðkirkjan er aðili að Alkirkjuráði, Kirknaráði Evrópu og Lúterska heimssambandinu. Samtökin hafa hvatt kirkjur sínar til að jafna hlutföll kynjanna í nefndum og ráðum þannig að þar sitji að minnsta kosti fjörutíu prósent konur og að minnsta kosti fjörutíu prósent karlar.

„Það þarf að bæta meira á aðra vogaskálina þangað til jafnvæginu er náð. Þannig eiga konur meiri möguleika á starfi eins og staðan er núna en þó er það ekki algilt. Það þarf að fylgja fjölmörgum reglum, til dæmis landslögum, starfreglum innan kirkjunnar og jafnréttisstefnunni, þegar kemur að ráðningu presta,“ segir Agnes og nefnir að nú séu nokkur prestsembætti laus til umsóknar.

Staða prests í Háteigskirkju var auglýst laus til umsóknar og sóttu nítján um. Þar af voru fjórar konur. Þá var staða prests á Skagaströnd auglýst laus og sóttu fjórir um og var kynjahlutfall jafnt.

Fjörutíu ár eru síðan fyrsta konan vígðist til prestsembættis innan þjóðkirkjunnar. „Það hefur auðgað og eflt kirkju og kristni í landinu að hafa prestvígt fólk af báðum kynjum. Það er hagur kirkjunnar að hlutföll karla og kvenna í störfum og ábyrgðarstöðum séu jöfn,“ segir í ályktun Félags prestsvígðra kvenna.