FH-ingar vilja fá Fomen

FH vonast til að hægt verði að ganga frá samningum við bakvörðinn Charley Roussel Fomen áður en lokað verður fyrir félagaskipti.

Þetta kemur fram á Fótbolti.net í dag en þar segir Birgir Jóhannsson, framkvæmdarstjóri FH, að samningar hafa náðst við Fomen.

„Við bíðum eftir pappírunum og hvort þetta gangi allt upp. Það er líklegra en hitt að það gangi,“ sagði Birgir en ítrekaði að ekkert væri frágengið.

Fomen er 24 ára vinstri bakvörður frá Kamerún sem hefur leikið með Marseille, Dijon og Clermont Foot í Frakklandi. Hann kemur til landsins í gegnum sama umboðsmann og Kassim Doumbia, sem gekk í raðir FH fyrir tímabilið.

Fram kemur á vef KSÍ að skila þurfi staðfestingu á dvalar- og atvinnuleyfi frá Útlendingastofnun fyrir leikmenn frá öðrum löndum en löndum innan EES, Grænlandi og Færeyjum.

Sam Tillen átti að leysa stöðu vinstri bakvarðar í sumar en hann meiddist illa á undirbúningstímabilinu. Þá meiddist Guðjón Árni Antoníusson á æfingu í vikunni og því kom það í hlut hins unga Böðvars Böðvarðssonar að spila gegn KR í gær. FH-ingar unnu leikinn, 1-0.