Víkingar styrkja sóknarleikinn með tveimur Bretum

Pepsi-deildarlið Víkings hefur gengið frá árssamningi við enska vængmanninn MichaelAbnett og skoska framherjann MarkTaylor en þetta staðfesta forráðamenn Fossvogsfélagsins við Vísi.

Abnett, sem er 24 ára gamall, kemur til Víkinga frá BÍ/Bolungarvík þar sem hann lék síðasta sumar sem og tímabilið 2011 undir stjórn GuðjónsÞórðarsonar.

Hann hefur í heildina leikið 40 deildar- og bikarleiki með Djúpmönnum og skorað í þeim tvö mörk en hann spilaði ekki með liðinu sumarið 2012, þar sem hann fór aftur heim til Englands.

Abnett er uppalinn hjá Crystal Palace en hefur einnig verið á mála hjá Mansfield Town, Lewes FC og Sutton United. Hann getur leikið á báðum vængjum og einnig sem bakvörður.

Mark Taylor er skoskur, 21 árs gamall framherji, sem kemur til Víkinga frá Lanark United sem leikur í C-deildinni þar í landi. Hann er uppalinn hjá Rangers, þar sem hann spilaði eitt ár sem atvinnumaður, en var síðar á mála hjá Kilmarnock leiktíðina 2012/2013.

Víkingar vonast til að þessir tveir leikmenn styrki sóknarleikinn sem hefur reynst Víkingum erfiður í byrjun tímabils. Nýliðarnir eru aðeins búnir að skora tvö mörk í fyrstu þremur umferðunum. Það hefur þó dugað til þess að innbyrða fjögur stig.

Víkingar ætla þó ekki að semja við ZephaniahThomas, framherja frá Sankti Kristófer og Nevis, sem æft hefur með liðinu undanfarna daga og horfði á leik þess gegn Stjörnunni á mánudagskvöldið.

Thomas hefur raðað inn mörkum í utandeildum enska boltans en þykir ekki vera í nægilega góðu formi til þess að hafa jákvæð áhrif á spilamennsku Víkinga.

Skotinn Taylor er kominn til landsins en Abnett lendir á morgun. Víkingar vonast til að þeir fái báðir leikheimild fyrir leik liðsins gegn Fylki á mánudagskvöldið í Víkinni.