Meira malbik á Dettifossveg

Langþráð vegagerð að frægum ferðamannastöðum á Norðausturlandi, kaflinn frá Ásbyrgi áleiðis að Hljóðaklettum, er að hefjast. Þetta verður jafnframt fyrsti áfanginn í síðari hluta nýs Dettifossvegar.

Forystumenn í ferðaþjónustu og sveitarstjórnarmenn í héraðinu hafa ákaft kallað eftir nýjum Dettifossvegi að vestanverðu við Jökulsá á Fjöllum enda er tilgangurinn að stuðla að farsælli þróun vaxandi ferðamennsku á svæðinu og styrkja byggðarlög í Norður- og Suður-Þingeyjarsýslum. Fyrsti áfanginn, syðsti hluti vegarins, var lagður á árunum 2009 til 2011, 25 kílómetra kafli frá hringveginum á Mývatnsöræfum og að Dettifossi. 

Það eru hins vegar enn 30 kílómetrar eftir, kaflinn milli Dettifoss og Ásbyrgis, og nú hefur Vegagerðin ákveðið að byrja á næsta áfanga, reyndar örstuttum, sem er þriggja kílómetra kafli frá þjóðveginum vestan Ásbyrgis áleiðis að Hljóðaklettum, suður fyrir heimreiðina að bænum Tóvegg, og á verkinu að vera lokið í júní á næsta ári.

Kostnaðaráætlun var upp á 133 milljónir króna og bárust sjö tilboð, það lægsta frá Árna Helgasyni á Ólafsfirði, upp á 125 milljónir króna, sem var 94 prósent af kostnaðaráætlun. Árni var sá verktaki sem lagði fyrsta áfanga Dettifossvegar. 

Hjá Vegagerðinni á Norðurlandi vonast Gunnar H. Guðmundsson svæðisstjóri til að næsti áfangi verði boðinn út fyrir lok þessa árs. Fjárveitingar til verksins á næsta og þarnæsta ári nema einum milljarði króna og segir Gunnar að það dugi fyrir helmingi þess sem eftir er. Þá vanti enn einn milljarð króna til viðbótar til að ljúka verkinu og segir Gunnar óvíst hvenær það gerist.