„Það mesta sem við höfum séð síðan 1995“

Snjóhæðin á Hrafnseyrarheiði á Vestfjörðum í vetur hefur ekki verið meiri í tæpa tvo áratugi. Svo segir Guðmundur Björgvinsson, yfirverkstjóri hjá Vegagerðinni á Ísafirði, í samtali við Vísi.

„Þetta er það mesta sem við höfum séð síðan 1995. Þetta eru glögg ummerki um það hversu rík norðvestanáttin var við Vestfjarðarkjálkann í vetur. Það var bara ein átt,“ segir Guðmundur. Hann minnir á að Skipadalur, þar sem myndin að ofan er tekin, sé skipskrokkslaga dalur og vegurinn í 520-530 metra hæð yfir sjávarmáli.

„Þetta er eins og þú færir að glápa upp undir brún á Esjunni og pæla hvernig væri ef þar væri vegur,“ segir Guðmundur og skýrir málið út fyrir borgarbarninu á hinum enda línunnar. Vegurinn hafi verið lokaður frá ársbyrjun og verið opnaður rétt fyrir páska.

„Svo gerði páskahret og varð aftur ófært í nokkra daga,“ segir Guðmundur sem vonast til þess að vetrinum sé nú lokið. Þrátt fyrir snjómagnið telur hann allar líkur á að snjó taki upp á heiðinni yfir sumarið.

„Þetta liggur svo vel við sól. Það er sjaldgæt að það verði snjór eftir.“

Göng munu breyta miklu

Ríkisstjórnin hefur samþykkt nýja samgönguáætlun sem gerir ráð fyrir að Dýrafjarðargöng verði boðin út árið 2016. Þau verða á milli Arnarfjarðar og Dýrafjarðar og leysa af hólmi veginn um Hrafnseyrarheiði sem lokast árlega í nokkra mánuði yfir vetrartímann og klýfur Vestfirði í tvennt. Annars vegar sunnanverða Vestfirði, Vestfjarðarbyggð, með þétttbýliskjarnana Patreksfjröð, Tálknafjörð og Bíldudal og hins vegar norðanverða Vestfirði með Ísafjörð, Bolungarvík og fleiri kjarna.

„Það eru menn á Ísafirði sem keyra á áttunda hundrað kílómetra í vinnu á Tálknafirði,“ segir Guðmundur. Með tilkomu ganga verði vegalengdin innan við 200 kílómetrar. Sum fiskeldisfyrirtæki fyrir vestan séu með seyði í Tálknafirði en kvíarnar í Dýrafirði og Önundarfirði.

„Það mun muna gríðarlega um þetta,“ bætir Guðmundur við. Þá geti fólk sótt sér verslun og þjónustu á Ísafjörð á einum degi í stað þess að taka ferjuna yfir í Stykkishólm eða keyra í Borgarnes. Hluti sem nú taki heilan dag eða fleiri verði hægt að gera á nokkrum klukkutímum.

Þá muni göngin hjálpa ferðamannaiðnaðinum á Vestfjörðum, enda margir ferðamenn sem koma með skemmtiferðarskipum sem leggi leið sína að fossinum Dynjanda.

„Í dag tekur það einn og hálfan tíma en eftir göng tæki það um 40 mínútur.“

Hér að neðan má sjá myndband sem BS-Tours birti af snjómokstri á Hrafnseyrarheiði og Sandsheiði í apríl.