Bæjarstjóri neitar því að laun unglinga séu "tittlingaskítur“

Akureyrarbær vill koma því á framfæri að tímakaup með orlofi í vinnuskólanum á Akureyri sumarið 2013 var hærra en í flestum sambærilegum sveitarfélögum. Þetta kemur fram í tilkynningu Akureyrarbæjar, sem send er í kjölfar frétta sem birtust á vef RÚV og Vikudags í síðustu viku.

Móðir fjórtán ára stúlku á Akureyri ritaði grein á vef Vikudags undir yfirskriftinni „Unglingavinna eða þrælavinna“.  Hún kallar þar laun unglinga í sumarvinnu hjá Akureyrarbæ „tittlingaskít“ og segist blöskra yfir launum unglinganna. Þá spyr hún hvað það myndi kosta bæinn að fá fullorðið fólk til að vinna þessi sömu störf og borga eftir taxta bæjarins.

„Því spyr ég mig, ætti ég yfirleitt að vera að hvetja dóttir mína til að sækja um hjá Akureyrarbæ í sumarvinnu og fá tittlingaskít að launum. Eða kenna henni frekar að hún eigi rétt á sanngjörnum launum fyrir sanngjarna vinnu og hunsa tilboð bæjarins um starf. Já maður spyr sig,“ segir í grein hennar.

Í tilkynningu frá Akureyrarbæ segir að vinnuskólar hjá sveitarfélögum séu starfræktir með ólíkum hætti, enda aðstæður milli landssvæða og sveitarfélaga ólíkar. Á Akureyri sé rekinn vinnuskóli þar sem ungmenni kynnist því að vera í launaðri vinnu en fái um leið fræðslu þar sem lögð sé meiri áhersla á vinnu og afköst. „Á þessu þarf að gera skýran greinarmun. Það er val hvers sveitarfélags hvort það starfrækir vinnuskóla eða unglingavinnu, enda er hér ekki um lögbundin verkefni sveitarfélaganna að ræða,“ segir í tilkynningunni.

Eiríkur Björn Björgvinsson, bæjarstjóri á Akureyri segir að laun í vinnuskólanum sé ekki sambærileg við það sem gerist í unglingavinnu, þar sem ekki sé boðið uppá fræðslu og skemmtun á vinnutíma. „Akureyrarkaupstaður hefur gætt þess að greiða ekki lægri laun í vinnuskólanum en sambærileg sveitarfélög og nú er verið að afla upplýsinga frá þeim svo hægt verði að ákveða laun fyrir 2014. Það verður síðan ákveðið í bæjarráði," segir Eiríkur Björn.