Húsavíkurmet í blóðgjöf

Litlu munaði að slegið yrði met í blóðsöfnun Blóðbankabílsins í gær. Húsavíkurmet var þó slegið, en sjötíu manns gáfu blóð á Húsavík í gær og vísa þurfti fólki frá vegna anna. Starfsfólk Blóðbankabílsins vann frameftir til þess að sinna sem flestum.

„Húsavík hefur alltaf verið rosalega sterk og gengið vel þar. Við þurfum klárlega að skoða það hvort ekki sé hægt að fjölga ferðum þangað,“ segir Jórunn Frímannsdóttir, deildarstjóri blóðsöfnunar Blóðbankans. Bíll Blóðbankans fer nú tvisvar á ári til Húsavíkur, sem og annarra svæða á landinu.

Hún segir Blóðbankann þurfa á um tvö þúsund nýjum blóðgjöfum að halda á ári til að viðhalda blóðgjafahópnum, en um níu þúsund manns voru í hópnum á síðasta ári.

Blóðbankinn þarf að búa yfir sex hundruð til sjö hundruð einingum af blóði. Þá er mikilvægt að nægar birgðir séu til af blóðflokknum O þar sem hann er helst notaður á slysavettvangi og í aðgerðum.  Það eru svokallaðar öryggisbirgðir sem Blóðbankinn þarf að búa yfir.

Jórunn segir blóðsöfnunina hafa gengið vonum framar síðustu ár. „Það hefur gengið mjög vel og fólk er ótrúlega duglegt að koma og leggja okkur lið.“

Hún hvetur alla til þess að gerast blóðgjafar. Hægt sé að koma til þeirra á Snorrabraut og mælir með að fólk fylgist með Blóðbankabílnum á vefsíðu þeirra, www.blodbankinn.is.