Sigur í stærðfræðikeppni kom á óvart

„Stærðfræði er áhugamál og maður gerir þetta ekki nema hafa áhuga á því,“ segir Sigurður Jens Albertsson, 19 ára nemandi í Menntaskólanum í Reykjavík sem stóð uppi sem sigurvegari ásamt norðmanninum,  Johan S. Wind, í Norrænu stærðfræðikeppninni. Þeir hlutu 16 stig af 20 mögulegum.

Keppnin fór fram á öllum norðurlöndunum 31. mars síðastliðinn og úrslit voru kunngerð í gær. Sigurður er ansi hógvær í samtali sínu við blaðamann Vísis. Hann segir það hafa komið sér á óvart að hann hafi unnið og keppnin hafi oft verið erfiðari en í ár. 

Það fari eftir því á hvernig það er litið hvort hann sé sérstaklega góður í stærðfræði. En honum finnst hún skemmtileg.

Þetta er í fjórða skipti sem Íslendingur er í fyrsta sæti í Norrænu stærðfræðikeppninni.  

Sigurður Jens er einn þeirra sex nemenda sem skipa Ólympíulið Íslands í stærðfræði. Auk hans munu þeir Kristján Andri Gunnarsson, Garðar Andri Sigurðsson, Hjalti Þór Ísleifsson og Dagur Tómas Ásgeirsson úr MR og Jóhann Ólafur Sveinbjarnarson úr MA í liðinu keppa fyrir Íslands hönd í Suður-Afríku í sumar.

„Ég hlakka vitaskuld til að fara út og keppa,“ segir Sigurður. Þeir félagar í Ólympíuliðinu verða í þjálfunarbúðum í stærðfræði í júní en keppnin í Suður – Afríku fer fram í júlí. Í þjálfunarbúðunum eftir kenna fyrrum keppendur þeim nýju meira í stærðfræði.