Óforsvaranlegt að engin sé umfjöllun um vanda tekjulægstu

Gylfi Arnbjörnsson, forseti ASÍ, fagnar niðurstöðu verkefnisstjórnar um framtíðarskipan húsnæðismála, sem skilaði skýrslu sinni í gær. Hann segir flestu að leyti sé tekið undir tillögur ASÍ varðandi húsnæðislánakerfið sem kynntar voru fyrir rúmu ári síðan.

Hann telur þó óforsvaranlegt að stjórnin hafi skilað auðu í umfjöllun um þarfir og vanda þeirra tekjulægsta í samfélaginu, og þeirra sem eiga í mestum húsnæðisvanda .

„Engar tillögur er að finna um það með hvaða hætti stjórnvöld ætli að koma til móts við gríðarlegan vanda þessa fólks sem þarf að nota allt að helming tekna sinan til að borga fyrir húsnæði,“ segir Gylfi.

Hann segir þetta skjóta skökku við í ljósi þess að ASÍ setti nýlega fram ítarlegar og útfærðar tillögur að nýju félagslegu húsnæðisleigukerfi, sem skilað gæti þeim árangri að tryggja tekjulægstu þjóðfélagshópunum aðganga að húsnæði á viðráðanlegum kjörum.

Í tillögum verkefnisstjórnar sem lagðar voru fram í gær er lagt til að fjármögnun húsnæðislána verði breytt, húsnæðissparnaður festur í sessi og leigumarkaður efldur. Þá er lagt til að húsnæðislánakerfið verði að danskri fyrirmynd þar sem gætt er betra jafnræðis á milli lántakenda og fjárfesta í lánaflokknum sem í ríkari mæli byggi á föstum óverðtryggðum vöxtum. Jafnframt leggur verkefnisstjórnin til að staðinn verði vörður um framtíðarhlutverk Íbúðalánasjóðs í nýja lánakerfinu. Hann verði ein af þeim húsnæðislánastofnunum sem hér starfi á lánamarkaði og verði áfram í eigu ríkisins.

Jafnframt er lagt til að Íbúðalánasjóði (ÍLS) verði breytt og núverandi verkefnum hans skipt upp, annars vegar í nýtt, opinbert húsnæðislánafélag sem annast almennar lánveitingar til húsnæðismála án ríkisábyrgðar. Hins vegar verður mörgum af þeim verkefnum sem ÍLS sinnir í dag, ásamt viðbótarverkefnum sem lögð eru til af verkefnisstjórn færð til sérstakrar stofnunar, meðal annars verkefni sem snúa að opinberri stefnumótun í húsnæðismálum.