Skattar á íbúðaleigu lækki um helming

Fjármagnstekjuskattur á tekjur af útleigu íbúðarhúsnæðis utan atvinnurekstrar og á grundvelli langtímaleigusamningar verður lækkaður úr tuttugu prósentum í tíu prósent, sem þýðir helmingslækkun frá því sem áður var. Þetta er meðal þess sem fram kom á fundi verkefnastjórnar um tillögur um breytta skipan húsnæðismála í dag.

Þar kom fram að vaxta- og húsaleigubætur verði sameinaðar í eitt húsnæðisbótakerfi og mun stuðningur miðast við efnahag en ekki búsetuform. Þá á jafnvægi að ríkja á milli útlána og fjármögnunar og umgjörð húsnæðislána að taka almennt mið af þröngri jafnvægisreglu. Húsaleigulög verða endurskoðuð með það að markmiði að treysta umgjörð leigumarkaðar og efla úrræði leigusala og leigutaka.

Í tillögunni segir að tímabundið frítekjumark verði sett á tekjur af útleigu íbúðarhúsnæðis utan atvinnurekstrar á grundvelli langtímaleigusamninga. Verkefnisstjórnin leggur til að frítekjumark verði 1,2 milljónir króna vegna tekjuáranna 2014 – 2016. Áætlaður kostnaður verkefnisstjórnar eru um það bil 300 milljónir.

Frumvarpið verður lagt fram á Alþingi og er niðurstöðu að vænta í haust.