Umfjöllun, viðtöl, myndir og einkunnir: Valur - Keflavík 0-1 | Góður sigur Keflvíkinga

Keflvíkingar unnu góðan 1-0 sigur á Val í síðasta leik dagsins í Pepsi deild karla. Leikurinn, sem fór fram á gervigrasvellinum í Laugardal, var heldur tíðindalítill en Keflvíkingar spiluðu góðan varnarleik og nýttu svo til sitt færi í leiknum þegar vinstri bakvörðurinn Magnús Þórir Matthíasson skoraði á 44. mínútu eftir sendingu frá Jóhanni Birni Guðmundssyni.

Daníel Rúnarsson, ljósmyndari Fréttablaðsins og Vísis, tók myndirnar sem sjá má í myndasyrpunni hér efst í fréttinni.

Valsmenn voru öflugir í byrjun leiks og það var aðeins frábær markvarsla Jonasar Sandqvist sem kom í veg fyrir að þeir næðu forystunni á annarri mínútu. Kristinn Freyr Sigurðsson komst þá í gott færi en Svíann varði vel með fótunum.

Keflvíkingar voru þó fljótir að ná áttum, þéttu vörnina og héldu Valsmönnum í skefjum. Gestirnir lágu til baka, skiljanlega í ljósi þess að Kristinn Ingi Halldórsson, fremsti maður Hlíðarendaliðsins, er með fljótari mönnum. Sóknarleikur Vals var ekki nógu markviss og þeim gekk illa að finna glufur á sterkri og vel skipulagðri vörn Keflavíkur.

Sóknarleikur Keflvíkinganna var varla til staðar í leiknum, nema í þetta eina skipti undir lok fyrri hálfleiks þegar Matthías komst einn gegn Fjalari Þorgeirssyni skoraði eina mark leiksins.

Það var sama sagan í seinni hálfleik. Keflvíkingar lágu aftarlega og stóðust flest áhlaup Valsmanna. Og í þau skipti sem vörnin opnaðist, þá var Sandqvist vel á verði. Hann varði m.a. kraftmikinn skalla Hauks Páls Sigurðssonar um miðbik seinni hálfleiks og greip auk þess vel inn í leikinn.

Valsmenn höfðu ekki góðu mörg og nógu góð svör við varnarleik gestanna og þrátt fyrir mikinn sóknarþunga heimamanna héldu Keflvíkingar út og unnu sinn annan sigur í tveimur fyrstu umferðunum. Kristján Guðmundsson, þjálfari Keflavíkur, hefði ekki geta óskað sér betri byrjunar.

Magnús:Gat ekki beðið um meira

"Mér fannst við spila aðeins of hægt í fyrri hálfleik, en við sköpuðum okkur þó nóg af færum til að komast yfir í leiknum. Fengum gott færi einn á móti markmanni og svo einhver skallafæri og skotfæri utan teigs en heilt yfir vorum við ekki alveg uppi á tánum í fyrri hálfleik, en við vorum samt með góð tök á leiknum," sagði Magnús Gylfason, þjálfari Vals, eftir tapið gegn Keflavík í kvöld.

"Svo sóttum við allan seinni hálfleikinn en boltinn vildi bara ekki inn. Ég gat ekki um beðið um meira frá mínum mönnum. Það voru allir að reyna og allir á fullu, en þetta tókst ekki."

Keflvíkingar nýttu nánast sitt eina færi í leiknum og Magnús sagði það viss vonbrigði.

"Auðvitað eru það gríðarleg vonbrigði. Eins og ég sagði, þá áttum við allan leikinn, en það gefur ekki neitt þegar hitt liðið verst vel eins og þeir gerðu í þessum leik. En við hefðum átt að skora úr einhverjum af þessum færum sem við fengum og heilt yfir er ég gríðarlega svekktur að hafa tapað þessum leik."

Keflvíkingar spiluðu sterkan varnarleik. Fannst Magnúsi Valsmenn vera með nógu margar lausnir við honum?

"Já, við sköpuðum okkur, að mér finnst, nóg af færum til að vinna leikinn. Við áttum margar fyrirgjafir, komust inn fyrir þá, upp í hornin og fengum auka- og hornspyrnur en nýttum það bara ekki nógu vel," sagði Magnús að lokum.

Kristján: Höfum uppskorið eins og við höfum sáð

"Við spiluðum okkar varnarleik heilt yfir nokkuð vel. Við fengum reyndar á okkur einhver fjögur færi sem markvörðurinn tók og það er hans hlutverk," sagði hæstánægður þjálfari Keflavíkur, Kristján Guðmundsson, eftir sigurinn á Val í kvöld.

"Við vorum fínir með boltann um miðbik fyrri hálfleiks og allt fram að hálfleik og skorum markið okkar á þeim tíma. Í seinni hálfleik erum við of langt frá boltamanninum, þrýstumst of langt til baka og erum ekki alveg nógu góðir að halda boltanum til að búa til betri sóknir. Við ógnuðum marki Vals alls ekki nógu vel í seinni hálfleik."

"Við unnum okkur út úr fyrstu mínútum í fyrri hálfleik, þar sem við fengum strax á okkur færi. Það tók okkur tíu mínútur að vinna okkur inn í fyrri hálfleikinn og byrja að spila eins og við vildum gera. Svo kom það eftir 30-35 mínútur og við skorum í fyrri hálfleik, en við gerðum ekkert í seinni hálfleik og það er eitthvað sem við þurfum að bæta.

Keflvíkingar hafa unnið báða leikina til þessa. Kristján hlýtur að vera ánægður með byrjunina á mótinu?

"Það er ekki hægt að hafa þetta betra, nema að halda hreinu í báðum leikjunum. En frammistaðan hefur verið fín í fyrstu tveimur leikjunum og við höfum uppskorið eins og við höfum sáð," sagði Kristján að endingu.