Tældi pilt með bílum, símum og skartgripum

Hæstiréttur staðfesti 18 mánaða fangelsisdóm Héraðsdóms Reykjavíkur  yfir tæplega fertugum manni, Sigurði Aroni Snorra Gunnarssyni, fyrir kynferðisbrot gegn ungum pilti.  

Pilturinn var á aldrinum 15 til 17 ára þegar misnotkunin átti sér stað á árnum 2009 til 2010. Sigurður er dæmdur fyrir að hafa tælt piltinn með gjöfum, fjárstuðningi, loforðum um peninga og með því að hafa látið hann hafa áfengi og fíkniefni.

Í dómi Héraðsdóms kemur fram að Sigurður Aron hafi gefið piltinum áfengi og fíkniefni, tvo bíla, annan þeirra í jólagjöf, tvo síma, skó, föt og skartgripi. Þá hafi hann lagt inn á hann samtals yfir 300 þúsund krónur, boðið honum með sér til útlanda, lánað móður hans peninga og keypt mat fyrir fjölskyldu hans.

Þótti Sigurður Aron hafa nýtt sér þá yfirburðastöðu sem hann hafði gagnvart piltinum. Við ákvörðun refsingar var litið til þess að Sigurður Aron hefði brotið gróflega gegn piltinum. Brot hans hefðu verið ítrekuð og brotavilji hans einbeittur. Honum hefði mátt vera ljóst hversu alvarlegar afleiðingar brotin hefðu fyrir piltinn.

Sigurði var jafnframt gert að greiða piltinum 1,2 milljónir króna í miskabætur.