Þriggja ára dómur yfir Daða Frey staðfestur

Hæstiréttur staðfesti í dag þriggja ára fangelsisdóm Héraðsdóms Reykjavíkur yfir Daða Frey Kristjánssyni fyrir að hafa numið tvær sjö ára stúlkur á brott úr strætóskýli við verslun Krónunnar í Árbæ. Atvikið átti sér stað í janúar í fyrra.

Honum er jafnfram gert að greiða hvorri stúlkunni um sig 800 þúsund krónur í miskabætur.

Daði ók stúlkunum tveimur á afvikinn stað. Hann kyssti aðra stúlkuna á kinnina og snerti maga þeirra og læri utan klæða. Hann keyrði þær svo aftur að skýlinu þar sem hann hleypti þeim út.

Stúlkurnar hafa glímt við misalvarlegar afleiðingar vegna brotanna. Faðir annarrar stúlkunnar segir hana ekki geta sofið eina í herbergi, hún fái martraðir og verði skelkuð í myrkri. Hún hefur þurft að sækja meðferð hjá Barnahúsi og Barna- og unglingageðdeild vegna þessa.

Foreldrum stúlknanna var brugðið þegar Daði Freyr ákvað að áfrýja dómi héraðsdóms í janúar síðastliðinn. Í áfrýjunarstefnu kom fram að Daði Freyr gerði þær kröfur að refsing hans yrði milduð og einkaréttarkröfur lækkaðar.