Maður bauð pilti bifhjól fyrir kynmök

Hæstiréttur staðfesti í dag dóm héraðsdóms Vestfjarða yfir tvítugum manni sem tældi dreng til að hafa við sig kynmök. Maðurinn var einnig sakfelldur fyrir að hafa í vörslu sinni myndband sem sýndi barn á kynferðislegan og klámfengin hátt, að mati dómara.

Maðurinn var dæmdur í sex mánaða skilorðsbundið fangelsi.

Brotið átti sér stað árið 2011, þegar sá ákærði var 17 ára gamall. Hann var sakfelldur fyrir að tæla strák sem var tveimur árum yngri en hann. Í dómsorði Hæstaréttar kemur fram að maðurinn hafi lofað drengnum peningagreiðslu eða bifhjóli ásamt fylgihlutum, sem laun fyrir kynferðismökin, maðurinn neitaði því, en viðurkenndi að þeir höfðu mök.

Maðurinn var einnig dæmdur fyrir að vera með í vörslu sinni barnaklám. Maðurinn sagðist ekki vita að til þess að hafa átt barnaklám í tölvunni sinni, hann sagðist fá ýmislegt sent og ekki vitað af þessari skrá.

Við ákvörðun refsingar mannsins var tekið tillit til þess að hann var sautján ára þegar brotin áttu sér stað. Einnig var tekið tillit til þess að hann var með hreina sakaskrá.

Honum var gert að greiða drengnum 600 þúsund krónur og var fartölvan hans gerð upptæk.