Lögreglan leitar vitna að slysi

Lögreglan á höfuðborgarsvæðinu óskar eftir vitnum að umferðarslysi sem varð á Geirsgötu í Reykjavík, á gatnamótum Geirsgötu og Tryggvagötu, í hádeginu í dag.

Tvær konur, sem voru á leið yfir gangbraut, urðu þar fyrir hvítum Volkswagen pallbíl (Transporter Double Cap). Tilkynnt var um slysið rúmlega tólf í dag. Pallbílnum var ekið norður Tryggvagötu og beygt inn Geirsgötu til vesturs þegar slysið varð.

Konurnar voru fluttar á slysadeild til aðhlynningar.

Þeir sem búa yfir upplýsingum um slysið geta komið þeim á framfæri í einkaskilaboðum á Facebooksíðu Lögreglunnar á höfuðborgarsvæðinu, eða í tölvupósti á netfangið thorir.geirsson@lrh.is.