Starfsumhverfi laskað á Hvanneyri

Borgfirðingar hafa miklar áhyggjur af stöðu Landbúnaðarháskóla Íslands á Hvanneyri og sérstaklega varðandi mögulega sameiningu við Háskóla Íslands. Heimildarmenn Skessuhorns innan Lbhí  segja að vinnuandi og starfsumhverfi allt, sé laskað vegna þeirrar óvissu sem hugsanleg sameining leiðir af sér.

Hún hefur verið til umræðu frá því í ágúst í fyrra og starfsmenn sem Skessuhorn hefur rætt við segja að búið sé að reka fleyg á milli annars vegar hluta akademískra starfsmanna Lbhí og hins vegar annarra starfsmanna.

Þá segir á á vef Skessuhorns að heimafólk í Borgarfirði, sveitarstjórnarfólk og allir þingmenn Norðvesturkjördæmis séu á móti sameiningu Lbhí og Hí. Athygli veki þó að sjálfstæðismenn í Borgarfirði hafi gagnrýnt hvað harðast framgöngu Illuga Gunnarssonar, menntamálaráðherra. Það hafi komið skýrt fram við opnun kosningaskrifstofu Sjálfstæðisflokksins í Borgarbyggð.

Skessuhorn sendi nokkrar skriflegar fyrirspurnir til Menntamálaráðuneytisins um málefni skólans, fyrir meira en mánuði síðan. Engin svör hafa borist. Skessuhorn hefur heimildir fyrir því að menntamálaráðherra ætli muni ekki tjá sig um mögulega sameiningu fyrr en eftir sveitarstjórnarkosningar.

Nánar má lesa um málið á vef Skessuhorns.