Yfir 400 manns sem greiða auðlegðarskatt fá niðurfelldar skuldir

Yfir 400 einstaklingar sem greiða auðlegðarskatt fá niðurfelldar skuldir samkvæmt frumvarpi ríkisstjórnarinnar um höfuðstólslækkun húsnæðislána. Málið var afgreitt úr efnahags-og viðskiptanefnd Alþingis í morgun. Stjórnarandstaðan gagnrýndi ríkisstjórnina fyrir ranga forgangsröðun og óvönduð vinnubrögð.

Málið fer þá væntanlega til annarrar umræðu á Alþingi í næstu viku en ríkisstjórnin hefur lýst því yfir að almenningur eigi að geta sótt um niðurfellingu þann 15. maí.

Steingrímur J. Sigfússon, þingmaður Vinstri grænna gagnrýndi málið á Alþingi í morgun.

„Í morgun fengum við gögn frá ríkisskattstjóra sem sýna að yfir fjögur hundruð einstaklinga sem greiða auðlegðarskatt munu fá niðurfelld lán. Um leið og þeir fá það frá ríkisstjórninni að auðlegðarskattur, 229 fjölskyldur með hreina eign yfir 120 milljónir króna, skulda samt að meðaltali 9,5 milljónir í húsnæðinu og fá lækkuð lán. Hvernig ætla menn að halda því fram að þessar aðgerðir séu ekki þar með að hygla og búa til auð hjá meðal annars ríkasta fólki á Íslandi? Þær munu gera það,“ sagði Steingrímur.

Katrín Jakobsdóttir, formaður vinstri grænna, sakaði stjórnarmeirihlutann um óvönduð vinnubrögð.

„Virðulegur forseti. Mér finnst einhver fúskbragur á þessu. Þegar ekki er hlustað á athugasemdir stofnana.  Tilfinning mín er að kappsemi manna við að ná þessu máli í gegn dragi úr forsjóninni og menn hafa gleymt því að kapp er best með forsjá. Því á góðum pitsustað, virðulegur forseti, þá eru menn með hráefnin á borðinu áður en þeir byrja að baka og vita um það bil hver niðurstaðan verður,“ sagði Katrín.

Guðmundur Steingrímsson, formaður Bjartrar framtíðar tók í svipaðan streng.

„Fjáraustur úr ríkissjóði upp á einhverja 80 til 200 milljarða jafnvel ef allt er tekið með í reikninginn algjörlega út í loftið án þess að hjálpa þeim sem eru í raunverulegum greiðsluvanda. Það liggur alveg fyrir. Ég sé ekki hvernig það er alveg augljóst að þetta sé það besta sem við getum gert fyrir heimilin,“ sagði Guðmundur.

Ragnheiður Ríkharðsdóttir, formaður þingflokks Sjálfstæðismanna, vísaði þessari gagnrýni á bug.

„Hér sýnt og heilagt talað um að þessi ríkisstjórn Framsóknar- og Sjálfstæðisflokks hygli þeim ríku í samfélaginu á kostnað þeirra fátæku, virðulegur forseti, þessi klisja almennt í umræðunni er með öllu ósásættanleg,“ sagði Ragnheiður