Vilja fá trampólín og hoppukastala fyrir hjólastóla

Starfsmenn Klettaskóla fengu leiktækjafyrirtækið Krumma ehf. til liðs við sig, til að smíða hjólastólarólu sem búið er að setja upp við skólann og hún er því íslensk hönnun og framleiðsla. Ferlinefnd Reykjavíkurborgar fjármagnaði verkefnið og er nú um hálfs árs vinnu lokið.

„Fólk í hjólastólum hefur ekki getað rólað og þetta gefur þessu fólki tækifæri, bæði börnum og fullorðnum. Rólan tekur nánast allar gerðir af hjólastólum, sem er mikilvægt,“ segir Hrafn Ingimundarson, framkvæmdastjóri Krumma og hönnuður rólunnar.

Rólan er úr áli sem gerir hana létta og við 30 gráðu útsveiflu á henni hallast búrið ekki nema um um það bil 15 gráður. Vegleg öryggisgirðing er til staðar í kringum róluna og strekkibönd og öryggisbelti tryggja öryggi þess sem rólar.

Krumma tekur þátt í stórri vörusýningu í Þýskalandi í haust og þar verður rólan kynnt. Hrafn getur vel hugsað sér að hanna fleiri leiktæki fyrir hjólastóla.

„Maður sér ánægjuna skína í gegn hjá krökkunum og þetta gefur bæði þeim og okkur mjög mikið.“

Krakkarnir kunna vel að meta tilbreytinguna og gleðin sem skín af þeim er smitandi. Í meðfylgjandi myndskeiði er rætt við tvö þeirra og óska þau eftir því að búin verði til trampólín og hoppukastalar fyrir hjólastóla. Þá má sjá sannkallaða gleðigjafa og býsna efnilega fréttamenn framtíðarinnar spreyta sig fyrir Stöð 2.