Mikilvægast að öryggi barnanna væri tryggt

„Ég hef rætt við nokkra foreldra barna í skólanum og ég hef ekki heyrt neina óánægju,“ segir Salvör Þóra Davíðsdóttir, foreldri tveggja barna við Rimaskóla og formaður foreldrafélagsins.  Eins og kom fram í Fréttablaðinu í morgun bar á því að foreldrar væru ósáttir við skort á upplýsingum þegar eldur kom upp í húsum við skólann um 12 leytið í gær.

„Ég sat bara og fylgdist með hverri fréttinni á fætur annarri á vefmiðlunum án þess að skólinn hefði samband. Ég er óánægð með upplýsingaleysið,“sagði móðir fyrsta árs nema við skólann.

„Mér persónulega finnst mikilvægast að skólinn sinnti því að börnin væru örugg,“ segir Salvör. Í skólanum séu 580 börn sem þurfti að tryggja öryggi á sama tíma og verið var að hafa stjórn á eldinum. Upplýsingum hafi svo verið komið til foreldra um leið og ljóst var að öryggi barnanna var tryggt.

Henni þykir sú gagnrýni á skólann að þeir hafi verið á eftir fjölmiðlum að greina frá málinu ósanngjörn. Blaðamenn hafi verið mættir á staðinn mjög fljótt og því hafi verið lítið svigrúm til að upplýsa foreldra áður en eldurinn komst í fréttirnar. Auk þess hafi börnin síma á sér og hafi mörg verið búin að senda myndir og upplýsingar í gegnum Facebook.

Óánægja foreldra sem hún hefur rætt við snúist aðallega um að þessi hús hafi verið þarna þrátt fyrir ítrekaðar beiðnir af hálfu skólans um að fjarlægja þau. Hafi þau staðið tóm í að minnsta kosti tvö ár. Þau hafi verið seld fyrir ári síðan og megi segja að þau hafi verið í niðurníðslu síðan.

Húsin eru í eigu Svifflugfélags Íslands eins og fram kom í fréttum Vísis í gær. „Við keyptum þau í fyrra og ætlunin var að flytja þau upp á Sandskeið,“ segir Kristján Sveinbjörnsson, formaður félagsins. Vegagerðin, sem nú er Samgöngustofa, synjaði félaginu hins vegar um leyfi til að flytja húsin þangað.