Leggur til að námslán falli niður við 67 ára aldur

Lagt er til að námslán falli niður við 67 ára aldur samkvæmt nýju frumvarpi, til breytinga á lögum um lánasjóð íslenskra námsmanna, sem Sigríður Ingibjörg Ingadóttir, þingkona Samfylkingarinnar, dreifði á Alþingi í gær.

Árlegar greiðslur af námslánum eru ákveðið hlutfall af tekjum fólks segir í tilkynningu frá Sigríði vegna málsins. Þeir sem hafi tiltölulega lágar tekjur geti því lent í því að greiða af námslánunum þrátt fyrir að þátttöku á vinnumarkaði sé lokið.

Ef ævitekjur eru tiltölulega lágar er lífeyrir fólks jafnframt lágur og því eru greiðslur fyrir þann hóp verulega íþyngjandi. Þær nemi um heilum mánaðarlegum ráðstöfunartekjum á ári.