Hvetur alla til að skoða sína stöðu

„Miðað við meðalverðbólgu síðastliðinna ára þá hefur heildarskuld á verðtryggðu láni vaxið upp í upphaflega stöðu þrátt fyrir að greitt hafi verið samviskusamlega í 5 ár,“ segir Eyjólfur Lárusson, framkvæmdastjóri tryggingafélagsins Allianz á Íslandi, í erindi til Vísis.

Tilefnið er gagnrýni Gylfa Magnússonar, fyrrum viðskiptaráðherra og dósents við Háskóla Íslands, í kjölfar ummæla Eyjólfs í Fréttablaðinu í dag. Þar sagði Eyjólfur að verðtryggð lán gætu hækkað á svipstundu vegna verðbólguskots og þar með væri allt inngreitt, þar á meðal séreignarsparnaðurinn, farinn.

„Hvað svo sem mönnum finnst um að nota séreignasparnaðinn til að greiða niður lán þá er þetta þvæla,“ sagði Gylfi í Fésbókarfærslu í morgunsárið. Hann bætir við að sú leið sem ríkisstjórnin hafi kynnt verði til þess að lán muni lækka. Inngreiðslan geti ekki horfið í næsta verðbólguskoti því lánið verði alltaf lægra en það hefði verið án inngreiðslunnar.

„Ég held að hinn almenni Íslendingur sem hefur verðtryggt lán hafi fundið þetta á eigin skinni,“ segir Eyjólfur í orðsendingu til Vísis síðdegis. Hvetur hann fólk til að skoða sína stöðu og vega út frá eigin hagsmunum.

Gylfi bendir ennfremur á í Fésbókarfærslu sinni í dag að ekki þurfi að greiða tekjuskatt og útsvar af þeim peningum sem notaðir séu til að greiða niður lán gangi tillögur ríkisstjórnarinnar eftir. Ólíkt því sem almennt gerist þegar séreignarlífeyrissparnaður sé tekinn út.

„Það eru talsverð skattfríðindi fyrir þá sem nýta þetta núna - þótt reikningurinn vegna þess lendi síðan á skattgreiðendum framtíðarinnar,“ segir Gylfi.