Fjarðarheiðin loksins opnuð á ný

Seyðfirðingar voru búnir að vera lokaðir inni vegna ófærðar á Fjarðarheiði frá því á miðvikudag, þegar leiðin opnaðist loks í morgun. Vöruskortur var orðinn í kaupfélaginu.

Vetrarríki er nú á Austfjörðum og flestar aðalleiðir hafa meira og minna verið ófærar undanfarna daga þar til í morgun, að vind lægði í bili og mokstur hófst um allt. Víða eru vegir þó enn þungfærir.

En það kann að vera skammgóður vermir því veðurspá gerir ráð fyrir áframhaldandi vetarveðri á svæðinu fram eftir vikunni með snjókomu, frosti og vindi.

Dæmi eru um að fólk,sem var statt á Seyðisfirði hafi misst af millilandaflugi og heimamenn hafa áhyggjur, þegar svona gerist, ekki síst með heilsugæslu í huga, því það getur verið margra klukkustunda akstur með sjúkling í snjóbíl yfir til Egilsstaða.

Fannfergið var svo mikið síðdegis í gær að annar gangamunni Oddskarðsganga stíflaðist af snjó. Vöruskortur var orðinn í Kaupfélaginu á Seyðisfirði, til dæmis fékkst þar hvorki mjólk né brauð, en nú eru þær nauðsynjar á leiðinni yfir Fjarðarheiði.