Femínismi er meira en Hildur Lilliendahl

„Femínistar eru mjög leiðir yfir þessu. Þetta setur ekki strik í reikning fyrir þá. Þeir hætta ekkert að vera femínistar. Femínistar eru líka eins misjafnir og þeir eru margir. Femínismi er miklu meira en bara Hildur Lillendahl. Það eru ekki bara einn eða tveir femínistar til, þeir eru þúsundir.“

„Hildur hefur aldrei tekið á sig ábyrgðarhlutverk fyrir femínista. Hún er í sinni baráttu og hefur gert góða hluti þar,“ segir Steinunn Rögnvaldsdóttir talskona Femínistafélags Íslands í viðtali við Vísi.

Fréttir um Hildi Lilliendahl Viggósdóttir hafa gengið eins og eldur um sinu á netheimum. Hildur eins og margir vita hefur barist á móti netníði og þá sértaklega gagnvart konum.

Hafdís Huld söngkona kom fram í Kastljósi í gær og birti  þar gróf ummæli sem Hildur hafði um söngkonuna á árunum 2009 og 2010. Þegar Hafdís ætlaði að kæra ummælin til lögreglu voru liðin tvö ár og of seint fyrir hana að kæra. Frá því í gær hafa verið talin til mörg harkaleg ummæli um ýmsa þjóðþekkta einstaklinga.

„Þetta sýnir það kannski einmitt að það sem þú setur á internetið  er þar áfram og fer ekkert. Það er eins gott að passa sig. Fyrst og fremst á fólk ekkert að segja svona hluti, hvort sem þeir verða uppgötvaðir eða ekki,“ segir Steinunn.

„ Þetta dæmir á engan hátt baráttuna sem Hildur stendur fyrir, baráttan er mikilvæg. Við femínstar erum á móti netníði. Baráttan hefur vakið fólk til umhugsunar um orðræðu sem er mikilvæg fyrir okkur öll.“