Sprengjuhótun: Íslensk kona og Schröder á hótelinu

„Það kom inn sprengjuhótun um klukkan hálf átta í gærkvöldi og rýma þurfti hótelið samstundis,“ segir íslensk kona, sem er gestur á Schloss-hótelinu í Kronberg í Þýskalandi.

Blása varð af afmælisveislu Gerhard Schröder, fyrrum kanslara Þýskalands, í gær eftir að sprengjuhótun barst á hótelið þar sem veislan var fyrirhuguð.

„Við máttum ekki taka með okkur nokkurn skapaðan hlut og hér var mikill öryggisviðbúnaður. Töluverður fjöldi lögreglumanna stóð að leitinni ásamt leitarhundum. Menn tóku þessu mjög alvarlega hér og voru allir gestir hótelsins fluttir á annað hótel í grenndinni.“

Veislan átti að fara fram á þakinu á hótelinu en Schröder varð 70 ára 7. apríl.

„Þetta var afmælishóf sem Rothschild-bankinn ætlaði að halda til heiðurs Schröder og voru hér miklir heiðursmenn á hótelinu. Schröder hefur verið að vinna sem sérstakur ráðgjafi fyrir bankann.“

Meðal gesta í afmælisveislunni var rússneski sendiherrann í Þýskalandi Vladimir Grinin, Jürgen Fitschen, forstjóri Deutsche Bank og Hartmut Mehdorn, framkvæmdarstjóri flugvallarins Berlin Brandenburg. Einnig voru háttsettir starfsmenn hjá Rothschild-bankanum.

„Til að byrja með trúði ég þessu ekki og hélt að þetta væri æfing, en fljótlega áttaði maður sig á því að þetta var alls ekki æfing. Þegar ég var komin fyrir utan hótelið sá ég Schröder og alla þá gesti sem voru á hans vegum.“

Mikið hefur verið fjallað um Schröder í þýskum fjölmiðlum að undanförnu og þá sérstaklega eftir að hann hélt upp á afmælið sitt í St. Pétursborg ásamt Vladimir Pútin, forseta Rússlands.

Mynd af þeim tveimur saman hefur vakið hörð viðbrögð í Þýskalandi en á myndinni sést þegar Schröder faðmar Pútín. 

Þýskir fjölmiðlar fjalla í dag um málið og telja þeir að rekja megi sprengjuhótunina í gær til vináttu Pútíns og Schröder.