Vefsíðan sverti mannorð nemendafélagsins og hún fordæmd

Nemendafélag Verslunarskóla Íslands hefur sent frá sér yfirlýsingu þar sem félagið fordæmir síðuna Peysopicker. Fram kemur í yfirlýsingunni að síðan sé ekki á vegum nemendafélagsins.

Vefsíðan Peysopicker er komin aftur upp en þar getur fólk valið á milli nemenda við Verslunarskóla Íslands sem raðast svo í topp tíu lista.

Vísir fjallaði um síðuna í mars en þá var aðeins hægt að velja á milli stúlkna í fjórða bekk í skólanum.

Nú hefur verið gerð breyting á síðunni og virðist vera hægt að velja á milli stráka og stelpna að þessu sinni.

Hér að neðan má lesa yfirlýsinguna frá Nemendafélagi Verzlunarskólans:

Vefsíðan Peysó Picker er ekki á vegum Nemendafélags Verzlunarskólans og Verzlingar eru ekki að hlutgera bæði kynin.

Það er verið að hlutgera Verzlinga í 4. bekk og vefsíðan svertir orð nemendafélagsins sem fordæmir hana algjörlega.

Peysufatadagurinn er einn eftirminnilegasti og glæsilegasti dagurinn á skólagöngu okkar og það er virkilega leiðinlegt að eigandi vefsíðunnar notfæri sér daginn til að vekja athygli á síðunni.

Nemendur skólans hafa unnið að því að koma vefsíðunni niður en eigandi hennar keypti hana með bitcoins, keypti þjónustu nafnleyndarfyrirtækis og vefsíðan er hýst í Bandaríkjunum.

Það gerir málið erfitt viðfangs. Ef einhver hefur upplýsingar um hver stendur á bak við Peysó Picker, þætti okkur virkilega vænt um að fá þær upplýsingar í hendur með einkaskilaboðum á forseti@verslo.is. Trúnaðar verður gætt.

Sigrún Dís Hauksdóttir, forseti NFVÍ.