Öryggisvottunum oft ábótavant á sölusíðum

Mikilvægt er fyrir neytendur að gæta að því að hlutir sem keyptir eru á netinu standist öryggiskröfur og beri vottun því til sönnunar.

Þetta segir Herdís Storgaard, verkefnisstjóri slysavarna hjá Landlæknisembættinu, en eins og komið hefur fram í umfjöllun Fréttablaðsins að undanförnu hefur verið mikill vöxtur í vörukaupum frá kínverskum sölusíðum, sérstaklega AliExpress, síðustu mánuði.

Herdís segist hafa kannað síðuna eftir að hafa fengið fyrirspurnir frá foreldrum um hana.

„Ég hnaut um að þarna er til dæmis verið að selja barnabílstól, sem er, þegar nánar er að gáð, bara sessa úr taui sem fest er við bílsæti og lítur út eins og bílstóll, sem er stórhættulegt og alls ekki í samræmi við staðla.“

Herdís segir auk þess ómögulegt að kanna hvort vörur sem þar eru til sölu, til að mynda reiðhjólahjálmar, hafi staðist öryggisprófanir og slíkt.

„Ég er ekki að fullyrða að hjálmarnir séu ekki í lagi en það vakna spurningar, sérstaklega ef litið er til bílstólsins.“

Slíkir staðlar eru afar mikilvægir, að sögn Herdísar, en í Evrópu eru almennt gerðar miklar öryggiskröfur til barnavöru almennt.

„Til dæmis að smellur innihaldi ekki eiturefni og detti ekki af fötunum þannig að barnið geti tínt þær upp í sig og þess háttar. Fólk verður að vera á varðbergi gagnvart öllu þessu.“