Hrói höttur í útrás

„Það er hörku dagskrá fram undan hjá okkur. Hópurinn hefur dvalið um nokkurra vikna skeið í Bergen og hefur verið að æfa stíft,“ segir Rakel Garðarsdóttir, framkvæmdastjóri Vesturports. Leikhópurinn frumsýnir The Heart of Robin Hood, eða Hróa hött, í Bergen á laugardag.

Sýningin hlaut einróma lof gagnrýnenda þegar hún var sett upp í fyrra með breskum leikurum hjá The Royal Shakespeare Company. „Okkur hefur gengið rosalega vel með þessa sýningu og við hlökkum til að sjá hvaða viðtökur við fáum hjá frændum okkar í Noregi.“

Sýningin í Bergen er á norsku, með norskum leikurum og tónlistarmönnum. Gísli Örn Garðarsson leikstýrir verkinu, meðleikstjóri og danshöfundur er Selma Björnsdóttir, leikmyndahönnuður er Börkur Jónsson, Högni Egilsson semur tónlistina og Björn Helgason er ljósahönnuður sýningarinnar.

„Við erum að setja verkið upp í einu sögufrægasta leikhúsi Noregs, Ibsenleikhúsinu, Den Nationale Scene,“ útskýrir Rakel.

Sýningin er leikgerð Davids Farr eftir sögu Hróa Hattar, einnar þekktustu þjóðsagnapersónu Englands, sem rændi frá þeim ríku og gaf hinum fátæku.

Eftir sýningar í Bergen heldur leikhópurinn vestur um haf og setur upp sýningu í leikhúsinu The American Repertory Theater, en það var á lista Time Magazine yfir þrjú bestu leikhúsin í Bandaríkjunum árið 2003.