Spennandi ferðalag til London fyrir nútímakonuna

Sigrún Lilja Guðjónsdóttir eigandi Gyðja Collection og Bjargey Aðalsteinsdóttir Íþróttafræðingur  eru fararstjórar í ferðinni  Ný og betri – Konur til athafna.

"Okkur langaði að bjóða upp á einstaka ferð sem myndi henta nútímakonunni, hvar sem hún er stödd í lífinu. Við munum upplifa London og á sama tíma næra okkur að innan og utan og vera í góðum félagsskap,“ segir Bjargey Aðalsteinsdóttir íþróttafræðingur sem nú bregður á leik sem fararstjóri ásamt frumkvöðlinum Sigrúnu Lilju Guðjónsdóttur sem oftast er kennd við Gyðju Collection.



„Okkur fannst London vera kjörin borg þar sem hún er mikil menningar- og viðskiptaborg. Þarna fá konur tækifæri til að víkka tengslanet sitt til muna út fyrir landsteinana og kynnast Íslendingum sem hafa náð gríðarlegum árangri erlendis,“ segir Sigrún Lilja Guðjónsdóttir.

Ferðin nefnist Ný og betri – Konur til athafna og er samansett úr því besta úr námskeiðum sem Sigrún Lilja hefur haldið ásamt móður sinni, Guðrúnu Barböru. Á námskeiðunum hefur hún hvatt konur til þess að láta til sín taka og fylgja draumum sínum. Aðspurð um samstarfið við Bjargeyju Aðalsteinsdóttur segir hún að þær hafi kynnst á námskeiðinu Brautargengi hjá Nýsköpunarmiðstöð Íslands þegar hún var að taka sín fyrstu skref í fyrirtækjarekstri.

„Bjargey hefur starfað við heilsueflingu í rúm 33 ár og hefur áralanga reynslu af Ný og betri-ferðunum svo okkur þótti tilvalið að sameina krafta okkar í þessari ferð,“ segir Sigrún Lilja og bætir við: „Farið verður yfir leiðir sem nýtast munu þátttakendum við sjálfstyrkingu, innri og ytri uppbyggingu, læsi á eigin líðan og hvernig koma má sér og sínu á framfæri.“ Skráning í ferðina fer fram á vef icelandair.is